KUCHING: Premier Sarawak, Datuk Patinggi Tan Sri Abang Johari Tun Openg deka mantaika licha nyerumba Randau enggau Eksibisyen Hidrogen Dunya 2022 ti diatur ba Rotterdam, Belanda bepun ari 9 nyentuk 11 Mei tu.
Iya deka nyereta urung 3,500 tuai perintah enggau industri ari serata dunya ngambi nyerungkai teknologi hidrogen, aplikasyen enggau chara pemadu baru ngemansangka industri nya.
Udah nya, deligit deka terebai ke Oslo, Norway ngulihka penerang pasal operasyen wang turu pengaya menua nya ke alai Abang Johari dekaka nya nyadi model ungkup wang turu ke sebaka ti ditumbuh Perintah Sarawak ngambi mayuh agi asil ngagai belanja Sarawak dudi hari.
Nitihka penerang ari Opis Premier Sarawak kemari, raban Premier deka bekejang ke Rotterdam pagila (Hari Enam) lalu diperambu datai pukul 7.45 malam lalu Duta Besai Malaysia ke Belanda, Datuk Nadzirah Osman deka ngambat penatai sida ba padang bilun mengeri palan penyangkai kapal nya.
“Ba slot pengelama 20 minit kena Hari Satu tu beserimbai enggau randau keterubah nya, Abang Johari deka nyadi pengelicha kedua berambaika jaku ‘Ngerumban Ekonomi Hidrogen Dunya: Chara Sarawak’ lebih agi ngangkatka Sarawak nyadi wilayah ke makin mansang ari sukut kuasa ulih dikena baru enggau sedia ngerandang pemansang hidrogen.
“Sarawak nya pemungkal nyerungkai ekonomi hidrogen ba pemujur numbuhka palan hidrogen keterubah di Kuching enggau diuji ba dua bas bekuasa hidrogen ba jalai di indu mengeri,” ku penerang nya.
Penerang nya mega madah, Sarawak diatu benung berunding enggau serikat ari Korea enggau Jipun ke bisi ati beranakka puku pasal pemansut hidrogen gadung di Bintulu enggau chara meli baru ari menua nya.
Pia mega ku penerang nya, Premier mega udah madahka Transit Aliran Automasi (ART) ti diperambu tembu taun 2025 deka ngena kuasa sel bahan api hidrogen nyadi sebagi ari program Sarawak ngurangka gis rumah gadung nipakka atur Randau Ubah Gaya Hari Menua Bersatu, Glasgow 2021.
Mua ke lemai Hari Satu pengudah bejaku, Abang Johari enggau deligit iya diperambu ngabas opis Shell di haque lalu iya deka mendingka taklimat ari Eksekutif Kanan Shell pasal pemansang Shell di Sarawak.
Kena pagi Hari Dua tu, deligit Premier diperambu betemu enggau Tuai Pegawai Eksekutif Palan Penyangkai Kapal Rotterdam lalu muak ke lemai sida deka dibai nemuai ngagai palan teknologi Shell di Amsterdam ti mandangka teknologi hidrogen enggau bemacham inovasyen baru ke bukai ari serikat multinasional nya.
Kelimpah ari nya, raban deligit deka terebai ke Oslo kena Hari Tiga tu.
Entara deligit ti nyempulang Premier Sarawak iya nya Sapit Premier Datuk Amar Douglas Uggah Embas, Sekretari Perintah Sarawak Datuk Amar Jaul Samion enggau Sapit Menteri Pengeluar Kuasa enggau Ngintu Rampa Menua, Dr Hazland Abang Hipni.
Pia mega, Sekretari Pekara Wang Menua, Datuk Sri Dr Wan Lizozman Wan Omar, Direktor Unit Perambu Ekonomi, Datuk Dr Muhammad Abdullah Zaidel, Chairman Pemansang Ekonomi Sarawak (SEDC), Tan Sri Datuk Amar Abdul Aziz Hussain, Chairman Sarawak Energy Berhad (SEB), Datuk Amar Hamed Sepawi enggau Tuai Pegawai Eksekutif SEB, Datu Sharbini Suhaili.
