KUCHING: Perintah Sarawak deka terus nyukung perambu Serakup Indu Dayak Sarawak (SIDS) ngaga begunan baru.
Premier Sarawak Datuk Patinggi Tan Sri Abang Johari Tun Openg madahka sebedau tu Chairperson SIDS Datuk Ir Alice Jawan Empaling kala ngusung iya bekaul perambu ngaga begunan SIDS awakka sida ulih meri servis ti lebih meruan ngagai komuniti indu SIDS.
“Maya nya aku madahka au, gaga aja,” ku iya.
Abang Johari bejaku munyi nya rambau Bejadika Aum Besai Indu Dayak di Palan Aum Borneo Kuching (BCCK) ditu, kemari.
Dalam jaku pemuka program kemari, Alice madahka SIDS udah besedia deka ngembuan sebuah begunan kediri lalu sida andalka Abang Johari ulih nyukung perambu nya.
Kelimpah ari nya, Abang Johari madahka raban orang indu ulih ditegapka nengah pekara teknologi ti diguna jam diatu.
“Proses penegap tu begunaka pelajar enggau polisi ti inklusif.
“Diatu, mayuh kompeni menua luar ngembuan pemesai orang indu ke alai Perintah Sarawak benung nyikap diri ngagai jeman nya baka dunya digital, ekonomi digital, internet enggau ke bukai.
“Nya alai, raban indu Dayak patut ngemansangka diri nyengkaum raban indu di menua pesisir,” ku iya.
Bekau pekara nya ku iya, Perintah Sarawak diatu benung bebendar ngaga infrastruktur pemun ti manah ngambika meri empas ti nyemetak ngagai raban indu di menua pesisir.
“Aku pechaya aum besai tu ulih nyadi pelasar ngayanka strategi baru ngagai orang indu Dayak ngemansangka diri,” ku iya.
Mega bisi diatur kemari iya nya pengawa ngelancharka bup pansik ‘Dayak Women and Development’ ari Yayasan Tan Sri Empiang Jabu.
