SIBU: Presiden Parti Sarawak Bersatu (PSB) Dato Sri Wong Soon Koh meri gaji 12 bulan iya dikena mantu ruang bilik seranta ba Kunsil Nengeri (DUN) Bawang Assan.
Pemutus iya ti mega pengari rayat dia nimbal petenah mensia mayuh dalam laman rama madahka iya enda bejalaika tanggungpengawa ngagai rayat maya menua benung betapi enggau pengerekai Covis-19.
“Aku sigi naka ulih mantu ngena chara ke pemadu manah nulung rayat kitai,” pia ku iya pandak nimbal pengarang berita, kemari.
Ba pekara bekaul, sepenyampau 2,600 pintu bilik ari 104 buah rumah panjai enggau genturung menua di Dun Bawang Assan deka nerima bantu barang pemakai ari Wong.
Bantu tu deka dianjung berengkah 31 March tu dalam kandang empat hari.
Ex-Sekretari Politik Andrew Shilling Bangit deka nguluka raban PSB nyadung bantu nya ngagai mensia mayuh.
Sebedau tu, bisi petenah dikerembai penguna media rama (facebook) ti ngena nama Juliza Petrus nyebut Sooh Koh lenyau sekumbang PKP dipejalai, kelimpah disebut sida nadai meri bantu sereta gawa ke rayat.
