Prinsip Lydia ba pengawa nganta

Taja udah bisi ngembuan batang pengawa tetap tang nya enda nanggul Lydia Mickey, 32 taun ngereja pengawa nyambil ba bidang penganta.

Peranak asal Kampung Lubuk Meranti, Simunjan madahka iya endang ituk nyaga mua sereta ngemeratka pengawa nganta kenyau ari mit.

“Enti disebut pasal nganta aku endang ituk sereta bejimat laban ba aku mua sereta tubuh kitai mesti dijaga enggau manah.

“Sebedau bedagang pan aku endang ngemeratka pekara nganta gamal laban ba aku semua kitai baikka indu tauka lelaki mesti bisi prinsip iya nya ngintu diri empu dulu sebedau ngintu orang bukai,” ku iya lebuh dirandau Suara Sarawak.

Nyerita pasal pengawa dagang Lydia nusi ya diatu ngaga mayuh servis nganta berengkah ari mantang bulu bansu, nanam lis mata, nyambung bulu mata, ngechat kukut, ngerit bulu mua enggau nuchi mua.

Lydia Mickey


“Semua servis tu digaga aku ba rumah aku empu ngena chap dagang LMBeauty.Studio di RPR Batu 12, Jalai Kuching, Serian.

“Lebuh agi sekula aku sigi udah chakah nitihka kus penganta laban aku endang merambu deka ngaga kereja nyambil enti udah bisi pengawa tetap.

“Aku belajar semua servis tu ari pengajar kelimpah mayuh meda ba ‘youtube’ enggau ‘facebook’,” ku iya.

Taja pia, Lydia madah iya enda terus bedagang ba bidang penganta ketegal ungkus nyendiaka servis tu mar.

“Aku berengkah bejual atas tali arus baka nyadi pemekal barang kosmetik, bejual baju, kasut enggau barang bukai dikena ngumpul belanja kelimpah mantu nambahka belanja apai indai.

NYINUK…Dalam sebulan aku ulih ngaga servis penganta ngagai 20 ngagai 30 iku aja laban ti gawa siang.

“Nyau kelama aku bejual kuih enggau kek tang aku enda ulih neruska dagang tu laban aku nadai awak ketegal ti suah minta saup bala beranjung kuih enggau kek ngagai rumah pemeli,” ku iya.

Udah nya, iya madahka takah beberapa bulan badu bedagang iya lalu nguji nyereta kus mantang bulu bansu ari siku pengajar ti ditemu iya ari ‘facebook’.

“Udah ngambi kus nya, aku lalu nguji mantang bulu bansu indai enggau ipar seraya ngelatih jari.

“Semak tiga bulan ngelatih diri baru aku muka servis tu ngagai mensia mayuh, nya pan pemuas diperansang apai indai ti suah nyukung pejalai dagang aku,” ku iya.

Ku iya, berengkah ari muka servis tu, sukung mensia mayuh ngagai iya endang manah laban orang suah muji iya landik sereta ituk.

NYINUK…Dalam sebulan aku ulih ngaga servis penganta ngagai 20 ngagai 30 iku aja laban ti gawa siang.


“Dagang tu digaga aku maya nadai pengawa enggau malam aja lalu sida ti deka ngambi servis tu dulu madah tumu.

“Dalam sebulan aku ulih ngaga servis penganta ngagai 20 ngagai 30 iku aja laban ti gawa siang,” ku iya.

Lebuh ditanya pemar ti ditapi ba dagang tu, Lydia madahka awak nyadi penanggul besai ngagai dagang iya laban tu semina kereja nyambil.

“Kekadang enda sempat makai laban aku ngerumban nangika orang nganti lama.

“Pia mega, aku napi pemar besemekih enggau dagang penganta bukai laban bidang tu udah majak popular.

“Bisi orang ti ngaga dagang tu nyadi pengawa tetap iya, tang aku semina kereja nyambil aja nya ngujungka aku enda ulih nerima peminta ti kelalu mayuh nangika enda puh,” ku iya.

Taja pia, Lydia madahka semua pemar tu enda ngasuh iya nyerah alah laban iya pechaya semua mensia endang bisi diberi bagi ari Petara.

“Aku kala ngaga servis mantang bulu bansu orang nyentuk ke Miri enggau Bintulu maya aku raun kin.

“Tebal agi sida ti ngena servis aku puas ati, ari nya sida bepadah ke pangan bukai kelimpah aku ngelakuka servis ba media rama baka whatsapp, facebook enggau ke bukai,” ku iya.

Sapa ti deka meda pengelandik Lydia dalam bidang penganta tau ngelawa Facebook iya LMbeauty.Studio tauka betelefon terus ngagai iya ba lumur 0138544791.

Gaya bulu bansu ke udah dipantang Lydia.
Lydia mega bisi nyendiaka servis ngechat kukut.

Suara Sarawak