SIBU: Bala prisinpal mesti ngembuan timpai penemu ke jauh tauka panjai runding landik ngemansangka sekula nengah strategi ke baru ti ulih mai empas ke manah ngagai sekula.
Tu berebak enggau mayuh udah pemar ditapi raban prisinpal maya pengerekai igi penyakit Covid-19 enggau ke diatu ba dalam renggat pandemik ti nguna pengelandik sida iya dalam ngatur sekula.
Sapit Chairman Gerempung Pengatur Pelajar Sekula Sekondari Sarawak (PPSMS) Yong Ing Thung madahka, pekara tu udah ngemai reti ke chukup besai ngagai sida iya ti minta raban prisinpal di menua tu nguna peneleba ngatur sekula sepengudah betempuh enggau pemar suba.
Iya mansutka jaku tu lebuh diberi awak mantaika jaku pengelalu rambau Program Bejadika Aum PPSMS Ke-57 ba sebuah palan ti tebilang di Sibu pagi kemari ti digulu Premier Sarawak Datuk Patinggi Tan Sri (Dr) Abang Johari Tun Openg.
“Rambai jaku ti dipilih ungkup aum PPSMS ke serak tu iya nya ‘Kepimpinan Pendidikan Mendepani Normal Baharu’ endang chukup engkeman bekaul pekara pelajar menua kitai.
“Laban tu senipak endar enggau pekara pelajar di menua kitai ti nerima empas ke chukup besai sepengudah bekau dikeruga Covid-19 suba,” ku Yong.
Tandu Yong, Aum PPSMS tu diatur laban sebengkah ari aktiviti ti chukup beguna dalam ngenataika penerang enggau penemu pemadu baru ngagai raban prisinpal.
“Tu mih pelasar ke pemadu manah endur bala ketuai ba sekula betukarka buah runding, bekunsi penemu sereta bekunsi chara ti pemadu manah berandau pekara ti ngaul isu pelajar kitai menua tu,” ku jaku Yong.
Ba Aum PPSMS Ke-57 tu udah diatur kenyau ari ensanus lalu udah bisi digulu 194 iku bala prisinpal sekula sekondari Nengeri Sarawak.
Iya mega nyebut, dikena nyapai juluk Pelin Pemansang Pelajar Malaysia sereta nempa modal mensia ti menyana enggau ngembuan kualiti, mayuh udah perambu udah diatur PPSMS.
Ku iya, tanggungpengawa nyadi prisinpal sekula endang chukup beguna kelebih agi dikena nyikap raban ketuai enggau penemu ti dinamik sereta proaktif ngerembaika Ekonomi Digital Sarawak.
