Prinsipal, pengajar nyadi chunto nembiak

KUCHING: Prinsipal enggau pengajar menggi tanggungpengawa besai nempa nembiak ti bisi kualiti ba pelajar.

Ku Kepala Menteri Datuk Patinggi Abang Johari Tun Openg, kualiti pelajar enggau modal mensia ti menyana mega bepanggai ba ulah bepenau prinsipal enggau pengajar nempa sida.

“Prinsipal enda tau enda mantaika chunto nyadi ketuai enggau chara ti patut ngemujurka pangku pengawa ti ngasi ba sekula.

“Kualiti nembiak tau ditempa ari ulah angkunka pelajar ti dikemeran seumur idup,” ku iya madah nyemetak.

Jaku Abang Johari dibacha Menteri Pelajar, Sains enggau Pansik Teknologi Datuk Sri Michael Manyin Jawong lebuh bejadi Aum Besai Pelajar Gerempung Prinsipal Sekula Sekondari Sarawak Ke-54 ba sebuah hotel tebilang ditu tadi.

KERANKA PEMANSANG… Datuk Sri Michael Manyin Jawong (tiga kanan) ngarika Kepala Menteri Datuk Patinggi Abang Johari Tun Openg ba Aum Besai Pelajar Gerempung Prinsipal Sekula Sekondari Sarawak Ke-54 ba sebuah hotel tebilang ditu tadi.

Iya mega meransang bala ketuai sekula meri perati ngagai nembiak ti tinggal ba pelajar.

Kelimpah ari nya, iya nesau bala ketuai sekula awakka ngemerat nembiak ti tinggal ba sistem pelajar sekula diatu.

“Enti kita enggai kiruh sereta enda ibuhka nembiak tinggal ba pelajar, sida tu deka buta urup lalu tinggal ari arus pemansang sekula sereta nekul pengawa ngemansangka modal mensia nitihka juluk menua tu.

“Nya kebuah aku ngelempaika pengandal ngagai bala prinsipal enggau pengajar nempa pemujur enggau penyulut ba sekula,” ku iya madah nyemetak.

Abang Johari mega meransang bala prinsipal nyukung agenda pemansang pelajar ti benung dipejalai enggau deka dilanggur perintah.

“Prinsipal enggau perintah patut ngaul kerejasama rat ngemujurka semua agenda pemansang pelajar ti udah enggau deka diperambu ungkup pemaik begulai.

“Ambika chunto, kitai deka bejalaika atur ngajar subjek Sains enggau Matematik ngena jaku English ngagai nembiak Primari Satu ba taun baru deka nerima sukung ari semua pengajar.

“Pia mega program bukai baka Program Science Technology Engineering and Mathematics (STEM), Program Memartabatkan Bahasa Melayu Memperkukuhkan Bahasa Inggeris (MBMMBI) enggau program bukai ti patut disukung lalu ulih dipejalai enggau meruan,” ku iya.

Pia mega, bala prinsipal patut bisi strategi, chara enggau jalai ngatur semua pemansang ba pekara pelajar.

Ngelansa pasal aum nya, urung 193 prinsipal ari selampur Sarawak datai baum ti berambaika jaku ‘Shaping Future Leaders’.

Sama datai Direktor Pelajar Sarawak Dr Haji Azhar Haji Ahmad, Tuai Pemegai Gerempung Prinsipal Sekula Sekondari Sarawak Abang Othman Abang Masagus enggau bala bukai.