KOTA KINABALU: Pengawa Bepilih Nengeri (PRN) Sabah deka ngubah Sabah nyadi nengeri lebih mansang jemah, pia ku Menteri Besai Tan Sri Muhyiddin Yassin.

Iya ti mega Presiden Bersatu madah, maya gaya ekonomi ti enda tegap enggau igi penyakit Covid-19 agi ngerekai, Sabah begunaka Perintah Nengeri ti tegap lalu bisi kaul rat enggau Perintah Besai.

“Warisan ukai sebilik enggau Perikatan Nasional (PN-Perintah Besai) lalu nadai nyengulai sebarang perintah kelimpah ari Perintah Sabah empu.

“Enti ditu, rayat Sabah milih PN begulai enggau Barisan Nasional (BN), Parti Bersatu Sabah (PBS) dalam Gempung Rayat Sabah ti ditumbuhka kitai, nya kebuah Perintah Nengeri sama enggau Perintah Besai.

“Nya alai, kitai ngaga bakanya ngambi ulih mantu Sabah lalu kitai ulih ngaul kerejasama ungkup pemaik rayat,” terang iya.

Muhyiddin mansutka jaku nya ba Pengerami Begulai enggau Menteri Besai di Dun Luyang, malam kemari.
Sama datai Sapit Presiden Bersatu Datuk Seri Dr Ronald Kiandee sereta chalun PN-SAPP ba DUN Luyang Gee Tien Siong engau chalun PN-MCA ba Dun Likas Dr Chang Kee Ying.

Datai ba Sabah pengudah mantaika Langgur Inisiatif Tambah Khas (Kita Prihatin) penyampau RM10 bilion di Putrajaya dikena mantu rayat napi empas ekonomi ketegal pandemik Covid-19, iya nyemetak madahka Inisiatif Kita Prihatin nya ukai ketegal PRN Sabah.

“Tu ukai ketegal Sabah bisi bepilih lalu ukai ungkup Sabah aja tang ungkup selampur menua ngambika pengidup kitai pulaika manah baru.

“Inisiatif tu mantu rayat ngambika pengidup sida badu merinsa lebuh suntuk pemakai, dagang enda laku lalu agi mayuh rugi.

“Aku nemu semua pekara ke nyadi ba menua tu laban aku Menteri Besai kita.

“Pekara pemadu beguna diatu iya nya nama pengawa ke patut dikereja ngambi mantu rayat lalu aku ngasaika Perintah PN udah bekenanas mantu rayat ba timpuh tujuh bulan tu,” terang iya silik agi.

Muhyiddin mega madahka bantu ti dibantai tu pengudah iya mendingka sebana rayat taja perintah udah ngagihka belanja RM290 bilion sebedau tu di baruh pakej peransang ekonomi.

“Aku ngarapka inisiatif tu ulih nyungkak baru ekonomi menua enggau Sabah lalu dudi hari, kitai deka meda tikas ekonomi disungkak deras agi.

“Nya kebuah, PRN nya penentu sentang pengawa ke ulih dikereja perintah dudi hari,” tandu iya.
Iya mega enggaika rayat ba Sabah ngasaika penatai iya ari Semenanjung nya ketegal deka bekuasa.

“Kemaya aku deka bekuasa ba Sabah tu? Kami kitu laban deka mantu kita lalu kami laban udah mantu kitai kenyau ari Sabah begempung dalam Perintah Besai.

“Kitai udah ngaul kerejasama rat ngambi ngiga chara ngemansangka Sabah.

“Nyangka Perintah Sabah diatu nadai begunaka saup Perintah Besai lalu ulih ngatur nengeri kita empu tang kitai bisi sistem dikumbai Perintah Besai ke alai mayuh pekara dalam Perintah Besai bekerejasama ngambika nengeri di Malaysia ulih jampat maju,” ku iya nandu.

Muhyiddin ti suah beratka pemesai reti kaul entara Perintah Nengeri enggau Perintah Besai, iya madah maya menua napi penanggul ekonomi, manah agi Presiden Warisan Datuk Seri Mohd Shafie Apdal duduk sebaris enggau iya.

“Sigi amat Shafie nya bakih ke manah lalu iya udah ngemansangka Sabah tang manah agi enti iya duduk sebaris enggau aku malam tu iya nadai ditu,” ku Muhyiddin.-BERNAMA