KUCHING: Dun Sarawak automatik padam kediri kena 1 Ogos 2021 nyema timpuh darurat nadai dilanjar lalu ngujungka pengawa bepilih nengeri ulih diatur dalam timpuh 60 hari berengkah 1 Ogos.
Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah madah, Yang Di-Pertuan Agong Sultan Abdullah Ri’ayatuddin Al-Mustafa Billah Shah udah ngerah darurat ketegal pandemik Covid-19 nyentuk 1 Ogos 2021.
“Nyema nyentuk 1 Ogos 2021, penyakit ba Sarawak apin bisi insur nyadi Yang Di-Pertuan Agong ngasaika enda likun endur ngatur pengawa bepilih, iya ulih ngelanjarka timpuh darurat nya enggau nangguhka pengawa bepilih besai nengeri.
“Maya engkeman endur pengawa bepilih besai nya bepanggai ngagai penyadi Covid-19,” ku iya nerang ngagai Suara Sarawak sehari tu tadi.
Karim ke mega Menteri Dagang Temuai, Seni enggau Main Asal madah, naka tu Perintah Sarawak ngemeratka pengelikun rayat ti enda ulih dimain.
“Enti nitih, timpuh Dun Sarawak baka ke udah diletak dalam kunstitusyen Perintah Besai enggau Nengeri iya nya genap lima taun abis kena 6 Jun 2021.
“Nyema baka selama Dun sigi udah dipadam awakka pengawa bepilih besai ulih diatur dalam timpuh 60 hari pengudah haribulan dipadam,” ku iya.
Ku iya tang laban beratika pengerai mensia mayuh, dia kuasa darurat mutarka pekara nya besai ari kuasa kunstitusyen.
“Taja pia kami ngarap program vaksinasyen dipejalai enggau serap awakka penyampau kes dirampit Covid-19 tu ulih nurun. Pia mega ngambika pengawa bepilih nengeri ulih diatur,” ku iya.
