ASAJAYA: Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah enda ngenggaika engka Pengawa Bepilih Nengeri (PRN) deka diatur sebedau tauka pengudah timpuh darurat abis bulan Februari tu.
Ku iya, nya di baruh bidang kuasa Kepala Menteri Datuk Patinggi Abang Johari Tun Openg ngambi minta pemendar Yang di-Pertuan Agong (YDPA) ngatur PRN tumu agi.
“Enti nadai penanggul enggau pengerekai Covid-19 majak nurun, aku pechaya Kepala Menteri ulih minta pemendar YDPA ngatur PRN tumu agi.
“Pekara tu bepanggai ngagai Kepala Menteri kitai ngatur PRN tumu agi tauka pengudah abis darurat,” terang iya.
Karim mansutka jaku nya ngagai pemberita pengudah nyuaka insentif ngagai nembiak nyulut SPM enggau STPM Sekula Sekondari (SMK) Asajaya ba Balai Opis Pelilih Asajaya, ensana.
Karim mega madah, iya pechaya Agong deka meri pemendar ngagai nengeri tu ngatur PRN tumu agi ba sebarang sanding penemu enggau penerang ke deka dibai ngagai YDPA ila.
Iya ke mega Adun Asajaya mega madah, Sarawak mengkang baka selama taja PRN diatur sebedau tauka pengudah darurat.
“Kami ba GPS udah sedia sekalika PRN nya diatur tumu agi tauka sebarang maya aja.
“Ukai reti kami kelalu andal tang kami nemu pengawa ke udah dikereja kami diatu lalu kami semampai sedia,” ku iya madah baru.
Ditanya pasal chalun ke deka bediri maya PRN ke deka datai, iya madahka chalun dalam PRN tauka Pengawa Bepilih Besai (PRU) tentu deka bisi chalun baru.
“Ari peneleba aku empu, abis nadai 10 peratus chalun ti deka bediri nya chalun baru.
“Tang, semua nya di baruh bidang kuasa Kepala Menteri lalu kitai enda ulih berandauka sapa chalun nya.
“Endang udah adat kami di PBB, semampai meri mandat ngagai Presiden kami nentuka sapa chalun laban iya lebih nemu,” ku Karim nerang.
