PRN12 bedau kekari

“Anang guai bepilih tumu, anti taun 2021.”

KUCHING: Kepala Menteri Datuk Patinggi Abang Johari Tun Openg madahka pengawa Bepilih Nengeri Ke-12 (PRN12) sigi enda dipejalai dalam kandang ke semak tu.

Ku iya, bedau kekari patut ngatur PRN12 laban timpuh Dewan Undangan Nengeri (Dun) Sarawak abis urung bulan September taun baru.

“Taja pia, Gempung Parti Sarawak (GPS) endang udah besedia kenyau ari penumbuh parti nya ba taun 2018.

“Naka tu, aku bedau bisi runding deka ngatur PRN12 ba pengujung taun tu tauka pun taun baru,” ku iya.

Abang Johari madah munyi nya lebuh dirandau pemberita di Wisma Bapa Malaysia ditu, pagi tadi.

Nangkan nya, iya madahka nganti taun 2021 baru ulih madahka maya PRN12.

“Anang guai bepilih tumu, nganti taun 2021,” ku iya.

Rambau PRN11 ti diatur ba taun 2016, Barisan Nasional (BN) ti diketuaika niang Kepala Menteri Tan Sri Adenan Satem menang besai ke alai 72 ari 82 kerusi menang pengawa bepilih nya.

PRN11 nya mega beratika empat komponen BN iya nya Parti Pesaka Bumiputera (PBB) menang 40 penuduk, Parti Rayat Sarawak (PRS) 11 penuduk, Parti Rakyat Bersatu Sarawak (SUPP) tujuh penuduk lalu Parti Demokratik Progresif (PDP) menang tiga penuduk.

Taja pia ba taun 2018, iya nya pengudah pengawa Bepilih Besai Ke-14(PRU14) empat komponen parti Sarawak nya mansutka diri ari BN lalu numbuhka GPS.