KUCHING: Kepala Menteri Datuk Patinggi Abang Johari Tun Openg meri ulu lungga Pengawa Bepilih Besai Nengeri Ke-12 (PRN-12) mesti diatur dalam kandang lima tauka enam bulan agi sebedau penggal Dun padam kediri ba bulan Jun 2021.

Kenu ku iya, PRN-12 enggai nyadi enda digaga nitihka pelasar undang-undang taja menua diatu benung napi pengerekai pandemik Covid-19.

“Aku enda nanggul nyema nadai PRN-12 laban GPS deka terus megai perintah tang kitai pechaya nya kuasa rayat.

“Kitai deka bulih mandat ari rayat,” ku iya lebuh bejaku ba Aum Besai Khas SUPP ditu, kemari.

Abang Johari ti mega Chairman GPS madahka iya tekenyit meda penerang piak penyakal ti madahka PRN-12 enda ibuh diatur ketegal Covid-19.

“Anang tusah ati, kitai deka mutarka pekara tu enggau rayat Sarawak empu lalu orang luar enda ibuh kiruh.

“Kitai mesti meri rayat kuasa nyadi penentu dalam sebuah perintah nitihka chara demokrasi,” ku iya madah nyemetak.

Kelimpah ari nya, iya mega mantaika pengirau ati bekaul pekara politik ti nyadi ba renggat Perintah Besai.

“Lebuh penanggul politik nyadi sebedau tu, GPS nyadi parti ti nentuka Menteri Besai milih Tan Sri Muhyiddin Yassin.

“Taja pia, nyentukka diatu penanggul politik menua bedau badu,” ku iya.

Abang Johari madahka, iya enda nganu ni bagi perintah tang maya menua napi Covid-19, rayat mesti diberi perati dulu.

“Baka nya mega GPS ti seruran ngemeratka rayat Sarawak.

“Politik ti stabil beguna amat dalam ngemajuka menua,” ku iya.

Sama bisi datai Presiden SUPP Datuk Seri Sim Kui Hian, Sekretari Besai SUPP Datuk Sebastian Ting enggau Tukang Wang PBB Datuk Ibrahim Baki.