Pro-Dr mantu nentuka kuing pelajar

BETONG: Projects of Dreams Realised Roadshow (Pro-Dr) nyadi pelasar dikena mantu bala nembiak ngiga tunga tuju pelajar.

Adun Layar Gerald Rentap Jabu madahka program tu pelasar ti manah ngagai bala nembiak ti deka kini tuju pelajar sida udah sida bulih pemutus peresa ba sekula sekondari.

“Ari peneleba piak Tegas ti ngatur program tu, mayuh nembiak ti bulih pemutus peresa ti manah tang enda nemu bidang tauka pengawa ti dikerindu sida.

“Enti pekara ti majak nyadi, Sarawak mega deka ngasaika pengerugi laban penau bala nembiak enda dikema sang tauka tebasau pia aja,” ku iya.

Gerald madah munyi nya lebuh bejadika program Pro-Dr ti diatur di Dewan Rentap ditu, 29 Februari tu tadi.

Nya alai ku iya, nya mih kebuah Tegas ngepunka roadshow tu kenyau lima taun ke udah dikena mantu bala nembiak ba nengeri tu.

“Aku ngelalau bala nembiak ngambika rajin betanya sereta enda malu.

“Ba program tu, kitai tau minta jaku lalau ari pengajar kaunseling tauka staf institusyen ke bisi ngaga eksibisyen ba ditu,” ku iya.

Nangkan nya, Gerald mega madahka ba pengawa pemansang nembiak, mayuh inisiatif dipejalaika Perintah Sarawak ti dipegai Gempung Parti Sarawak (GPS) ngambika ulih mansutka nembiak ti chakah dalam pengawa.

“Entara iya penumbuh Centexs ti nyendiaka kus teknikal enggau digital ti bisi ba empat bengkah institusyen di Kuching, Lundu enggau Lawas.

“Kelimpah ari nya, Perinrah Sarawak mega ngemeratka guna Jaku English dalam pelajar bala nembiak ba sekula laban jaku tu dikena selampur dunya baiknya ba pengawa dagang, sains, teknologi enggau digital,” ku iya.

Nya kebuah enti Sarawak deka mansutka nembiak peranak menua tu ti dinamik sereta chakah, bala nembiak Sarawak meseti landik bejaku enggau nulis ngena Jaku English laban.

Ukai nya aja ku Gerald, Perintah Sarawak enda ngelakka pengawa belajar vernikular lalu nyukung sereta ngaku Unified Examination Certificate (UEC).

Gerald ngelalau bala nembiak ba nengeri tu kelebih agi ba sitak Layar ngambika seruran ngemeratka pemansang nengeri ngambika kitai ulih nyadi nengeri pemadu mansang di Malaysia ba taun 2030.

Roadshow Pro-Dr entara program bejalai pelajar pemadu besai diatur di Sarawak lalu rambau program nya di Betong, bisi 45 institusyen pelajar, ejensi bantu pelajar enggau Guru Kaunseling Kerjaya bisi ngaga eksibisyen.

Program nya mega diatur pengelama dua minggu berunggu ba 14 palan nyengkaum di Kapit enggau Kanowit ti nyadi palan tambah.

Suara Sarawak