ARTIKEL

Produk Adfiwen Handicraft udah datai di Turki

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Pengempu Adfiwen Handicraft, Audrey Benya Wong chukup temegah meda produk krafjari iya dibeli sereta dikerindu peranak menua luar.

Peranak asal Bintulu nya madah, produk ba Adfiwen Handicraft baka Terabai, Set Ngepan Indu Enggau Kain Batik kala dibeli siku peranak ari menua Turki.

“Siku penguna ari Turki din meli produk aku dalam bulan Ogos taun nyin kemari lalu iya meli produk nya dikena ngias rumah.

“Mayuh ga beli lebuh nya laban sekeda produk nya deka diberi ngagai bala sida din nyadika tepa.

“Naka pengaga ati lebuh penguna ari menua Turki rinduka keresa lama ari Sarawak tu.

NGEPAN INDU… Dara bajik anang enda ingat singgah meda dulu ngepan Iban di kedai Adfiwen Handicraft.

“Temegah ati lebuh iya madahka diri deka meli produk nya laban tu mandangka keresa lama kitai Dayak mega dikerindu peranak luar,” ku Audrey ngepunka randau enggau Suara Sarawak.

Naka diatu, kedai Adfiwen Handicraft tu bisi dua buah iya nya tisi lampu traffic ba Pasar lalu sebuah agi di ringkat atas Tamu Bintulu.

Audrey mega ngarapka dudi hari iya ulih ngemansangka dagang Adfiwen Handicraft lalu ulih muka kedai baru Adfiwen Handicraft ba Sarawak.

Pia mega, iya ngarap ulih nyadi pemekal pemadu besai ungkup produk keresa lama ba Sarawak ngambi pedagang bukai nadai suntuk bekal baru.

Nyerumba Pengerami Gawai ke deka diintu enda lama agi, Adfiwen Handicraft bisi ngaga promosyen ungkup penguna ti meli seset tawak.

Audrey madah, beserimbai enggau Pengerami Gawai tu sida bisi ngaga promosyen ke alai bala penguna ti meli seset tawak deka diberi kain batik pechuma.

Ku iya, sida mega deka meri diskaun ngagai bala penguna ke bisi singgah bebelika barang ba Adfiwen Handicraft.

KERESA LAMA… Entara keresa lama kitai Iban bisi dijual ba kedai tu.

PESAKA KITAI

Indu bajik penakan China enggau Iban tu mega madah, bemacham keresa lama bisi dijual baka ngepan asal Dayak iya nya ngepan Orang Ulu, Iban enggau Bidayuh.

Peranak Bintulu beumur 25 taun tu mega bisi nyual baju chura Dayak, baku temaga, tabak temaga enggau kelita temaga.

“Aku mega bisi nyual sangkuh, sumpit, tikai, pasu Sarawak, kebuk, ilang, kain batik Sarawak enggau ke bukai.

“Ba kedai tu, kami bisi nyual set tabuh Iban, tawak temaga, gong Bidayuh enggau gaun indu ukir Dayak.

“Aku teulihka runding ngepunka dagang tu laban deka ngujika nasip diri bedagang baka orang bukai.

LIAT ATI… Audrey keran ngemansangka kedai Adfiwen Handicraft sereta ngangkatka pesaka asal kitai Dayak.

“Ukai semina nya aja, aku mega keran deka nambahka penatai pemisi kami sebilik, nyaup ngangkatka bansa Dayak nengah chara nulung bejualka keranjai jari sida.

“Tang batang tuju aku deka bejualka keresa lama endang deka ngangkatka pesaka kitai Dayak ngambi dipandang ngagai bansa tauka menua bukai,” ku Audrey nerang.

Ku Audrey, nama kedai Adfiwen Handicraft nya kebendar digaga indai iya ngangkatka nama sida menyadi iya nya Audrey Fiona Wendy.

DAGANG KUSUT

Audrey madah, entara produk pemadu laku ba kedai iya nya Set Tabuh Iban, Set Ngepan enggau Baju Burung sereta kain batik ukir Sarawak.

Iya madah, semua produk dijual ba Adfiwen Handicraft nya ukai digaga iya empu lalu mayuh agi ke ngupah bala diri empu ngaga produk nya.

Audrey madahka semua produk dijual iya nya diangkat ari bala diri empu tauka diri serumah.

“Sebedau tu, aku bulih untung manggai RM10,000 ngagai RM35,000 sebulan.

“Puji Tuhan, produk dijual ba kedai aku tu chukup laku lalu bisi peminta belama.

“Tang mih sekumbang pandemik tu, bisi kusut ga untung aku laban mayuh orang agi nangi mindah ke bukai kelimpah pekayan asal tu suah agi nerima peminta maya musin pengerami.

“Sebedau pandemik mega kami ukai semina bejual ba kedai aja tang suah bejual ngagai menua bukai.

“Nya kebuah berupai kusut dagang laban diatu nyau bejual ba kedai aja sereta arapka untung makin betambah lebuh bejual ba media rama.

Ku Audrey, jauh amat kusut dibanding sebedau pandemik Covid-19 kelebih agi diatu perintah netapka kitai semina berami enggau diri sebilik aja lalu enda ulih pulai ke menua.

PELASAR ONLINE

Nambahka nya, iya berasai lantang ati laban dagang Adfiwen Handicraft ti dipungkal kenyau ari taun 2016 agi beretan sereta mengkang nerima peminta ari penguna di Sarawak.

“Pemar enggau penguji ba dunya dagang kraf endang bisi kelebih agi lebuh muka kedai dagang kraf.

“Entara penguji ba dunya dagang kraf iya nya begunaka besai belanja dikena bebelika keresa lama tu.

“Tambah mega baka keresa lama tu ukai suah dibeli orang laban ngepan asal tu suah dikena orang maya musin pengerami enggau begawai aja.

“Baka terubah aku ngepunka dagang tu endang begunaka besai belanja iya nya urung RM100,000.

“Kebuah pia laban genap keresa lama nya berega amat lalu siti nya manggai beribu ringgit.

“Tang bai ati keran deka ngangkatka pesaka lama kitai, aku sanggup mansutka besai belanja dikena ngepunka dagang enggau muka kedai Adfiwen Handicraft.

Berebak enggau nya, Audrey madahka naka diatu iya endang ngelakuka dagang tu nengah pelasar digital baka Facebook, Shopee enggau Instagram.

Tang ku Audrey, iya suah agi ngelakuka barang ba Facebook page Adfiwen Handicraft baka mantaika promosyen baru nyerumba musin pengerami kelebih agi Pengerami Gawai Dayak.

“Baka ba Shoppe, kami ngaga akaun nya laban dekaka penguna ari Semenanjung tauka menua bukai bela ampit ulih bebelika keresa lama tu.

“Kebuah pia laban enti bala penguna meli keresa lama ari Shopee tu, ulih ga sida ngelimat belanja laban ungkus nganjung barang nya jauh murah ari servis nganjung barang ke bukai.

Tambah mega, iya madahka Shopee bisi nyendiaka servis nganjung barang ngagai serata dunya lalu kitai ulih milih sekalika deka ngena servis nganjung barang ti mar tauka mudah.

PERANSANG APAI INDAI

Sida mega bisi ngaga akaun Instagram ngambi ngemuntangka bala penguna meda genap produk tauka stok baru datai kami.

“Orang ke balat meransang aku ngepunka dagang kraf tu endang nadai orang bukai kelimpah ari apai enggau indai.

“Pengudah abis nampung pelajar Degree, aku lalu berengkah nampung dagang seduai laban dagang Adfiwen Handicraft tu kira dagang kami sebilik.

“Abis belajar tadi endang nadai penanggul ga aku nampung dagang tu laban seduai nyau majak tuai, enti enda kami semenyadi sapa mih agi deka nampung dagang ngelakuka produk kraf tu,” ku Audrey nerang baru.

Terang Audrey, apai enggau indai iya mih suai ngembing ba dunya dagang baka baka ni deka ngelakuka dagang, baka ni ngiga pemekal produk tu enggau ke bukai.

Ku iya, engka pasal dagang digital aja mih sida semenyadi mungkal tauka berundingka inisiatif nya laban utai nya agi baru sereta inisiatif baru jeman diatu.

Enggau peluang tu, Audrey meri Selamat Ngintu Pengerami Gawai Dayak ngagai semua raban bansa Dayak.

Besampika kitai gerai belama lalu arapka igi penyakit tu jampat pukas ngambi kitai ulih ngereja pengawa baka selama.

Iya mega meri besai terima kasih ngagai semua penguna ke kala meli produk ba kedai Adfiwen Handicraft.

Ku iya, ngagai sida ke apin kala singgah ba Adfiwen Handicraft, tau meh singgah ba kedai tu laban sida endang deka meri rega ‘special’ belama.

BERITA LAIN

BERITA TERBARU

Projek naik taraf lima jalan di Meradong siap

BINTANGOR: Penduduk lima penempatan di Meradong kini menikmati kemudahan yang lebih selesa apabila pelaksanaan lima Projek Mesra Rakyat (PMR) membabitkan kerja baik pulih jalan raya