Produk ari kayu tebelian digaga Sudirman diatu berega manggai RM20, 000

KUCHING: Sebedau tu dagang produk ari kayu tebelian ke digaga Sudirman Gindau, 46 semina dijual enggau rega RM80 tang diatu diatu rega produk ke g kayu tebelian ke digaga iya majak niki rega manggai RM20,000.

Ku Sudirman, pengawa ngukir kayu tebelian tu digaga bepun ari minat ti chukup dalam kenyau ari mit.

“Berengkah taun 2014 baru aku tama ngagai Kraf Jari Malaysia megai pengelandik ngukir kayu tebelian.

“Kelimpah ngukir, aku mega ngaga mangkuk, keris, mangku, mija enggau agum ari kayu tebelian,” ku iya lebuh ditanya pemberita rambau ngayanka produk kraf jari di Plan Kraf Jari Malaysia Pampang Sarawak Jalai Stadium apin lama.

Ku Sudirman, sebedau pengerekai penyakit Covid-19, iya ulih nyual 10 unit ukir tauka keresa ti digaga ari kayu tebelian dalam sebulan ti dijual ari RM80 ngagai RM20,000.

Sudirman Gindau

“Lebuh pengerekai penyakit Covid-19 nyadi, bala tauke enggau pemeli jarang keluar tauka ngusung aku.

“Nya ngujungka aku semina bepanggai ngagai udar tauka peminta ari mensia mayuh aja.

“Pengawa ngukir tebelian tu endang batang pengawa aku, nya ngujungka aku napi pemar lebuh deka mayar gaji bala pengereja pengawa ti nyaup aku ngukir,” ku iya.

Tandu iya, dalam sehari iya ulih ngaga tiga igi mangkuk tebelian bepanggai ngagai pemesai sereta pemar ukir ti digaga.

“Kayu tebelian ti bedau diproses dibeli aku ari orang kampung enggau sebarang orang ti bisi nyual kayu tebelian.

“Entara pemanah kayu tebelian tu, iya jauh tan enti dibanding enggau kayu bukai laban enda nemu repuk,” ku iya.

Berebak enggau nya, Sudirman madahka entara pemar ti ditapi iya lebuh ngukir kayu tebelian iya nya pemar ngangkut kayu ti bedau diproses.

“Lebuh ngeluarka kayu tebelian ari kampung orang aku ngeluarka ungkus ti besai laban semina mesin aja ulih ngangkut kayu tu.

“Pia mega, aku begunaka keresa baka tinso enggau penyayat kayu lebuh deka proses kayu tebelian, enti mesin enggau keresa aku jai, aku ngeluarka ungkus ti besai dikena meli baru,” ku iya.

Nangkan nya, Sudirman madahka entara bala pemeli ti kala meli kayu tebelian ti diukir iya iya nya Raja Pemaisuri Agong, Sultan Selangor enggau raban pemesai bukai.

“Kayu tebelian ti digaga aku ukai ungkup siku orang aja, tang mega bisi dibeli ngambika dipandang ba hotel enggau palan ngelakuka barang.

“Aku tebal agi ngaga produk ari kayu tebelian tu ngambika ulih diguna ungkup pekara bukai baka kelimpah mandangka ukir, produk nya mega ulih digaga nyadi palan ngengkah buah tauka ulih nyadi singki.

“Aku ngarapka, pengawa ngukir kayu tebelian tu majak ditemu mensia mayuh ngambika rebak baru ngelala bansa kayu ti berega tinggi di menua tu,” ku iya.

Produk ari kayu telebelian ti digaga Sudirman kala dibeli Yang Dipertuan Agong enggau Raja Pemaisuri Agong rambau nemuai ke Sarawak. Produk nya sebuah bangku ti ngembuan antap sebilah keris.

 

Produk ari kayu telebelian ti digaga Sudirman kala dibeli Yang Dipertuan Agong enggau Raja Pemaisuri Agong rambau nemuai ke Sarawak. Produk nya sebuah bangku ti ngembuan antap sebilah keris.

 

BEREGA…Entara produk ari kayu telebian ke digaga Sudirman.

Suara Sarawak