Produk ekodagang temuai S’wak

Kampung Tribal Borneo

BAU: Kampung Tribal Borneo di Kampung Apar, urung 50 kilometer ari indu mengeri Kuching nyadi produk eko-dagang temuai ti nyelai.

Menteri Utiliti, Datuk Seri Stephen Rundi Utom madahka genturung pendiau nya ditumbuh ari pengawa begulaika gaya pesaka asal ti dikelingi pemanah rampa utai tumbuh enggau utai idup.

Ku Rundi, menua kitai chukup betuah ngembuan mayuh adat enggau pesaka asal nyengkaum keresa lama ti tau dipandang lalu nyadi pematak temuai datai kitu.

“Nya kebuah bala pengusung ti datai deka bisi awak ngasaika penyelai gaya idup bansa Bidayuh ti ditampung ari aki ini kelimpah ngemeranka adat enggau main asal.

“Sida mega ulih ngasai penyelap kesuh angin enggau penyiru ai sungai sereta nimpai pemanah rampa menua asal,” ku iya lebuh bejaku ba pengawa bejadika Pengerami Tribal Borneo 2019 (BTF19) ditu, kemari.

Pesta Tribal Borneo ti diatur kedua kali mega diisi enggau bemacham atur pengerami narit ati baka mantaika pemakai enggau ai irup asal, main asal, mandangka main asal bansa sereta muzik asal.

Kesemua penyelai tu ku Rundi deka nyadi pengelebih menua kitai ngangkatka Kampung Tribal Borneo ngagai produk eko-dagang temuai sereta ulih mansutka asil ngagai menua.

Nya alai Perintah Sarawak keran ngemansang sereta ngangkatka genturung pendiau tu nyadi produk eko-dagang temuai lalu ulih nyungkak ekonomi peranak ditu, tandu Rundi.

Stephen Rundi Utom

Suara Sarawak