Produk komoditi Sarawak bisi penau dieksport ke Romania

KUCHING: Produk komoditi baka getah enggau sawit bisi penau besai ulih dieksport ngagai menua Romania, ku Presiden Balai Dagang enggau Industri Orang Ulu (OUCCI) Datuk Mutang Tagal.
Ku iya ti mega nyadi Konsul Dipebasa Romania di Sarawak madahka, menua nya enda entu mansang ari sukut teknologi baka menua Eropah ke bukai.
“Tang ari sukut betanam betupi, Romania ngembuan penau ke sama baka Malaysia kelebih agi Sarawak.
“Kita ulih nyual produk baka minyak sawit, getah, produk elektronik enggau papan mayuh guna ngagai Romania,” ku iya lebuh randau eksklusif begulai enggau Suara Sarawak, kena 18 Januari tu tadi.
Ku iya nambah, tanggungpengawa iya ti nyadi Konsul Dipebasa ngambika Sarawak ulih betukar penemu bekaul enggau makit besai di Romania,
“Tu nyengkaum betukar penemu ari sukut budaya, pelajar, dagang enggau ke bukai.
“Taja pia, berindik ari pengerekai igi penyakit Covid-19, kitai enda ulih nemuai ngagai Romania lalu ngarapka pengudah semua tu lantang ila, kita ulih neruska semua perambu ngagai menua nya,” ku iya.
Mutang madahka, Romania nadai mayuh bida enggau Sarawak lalu chukup manah ari sukut industri dagang temuai.
Ku iya mega, enti sema bisi kompeni kayu ti deka ngerembaika dagang sida ngagai Eropah, sida tau numbuhka opis di Bucharest laban ungkus ti murah enti dibanding enggau menua Eropah bukai baka Perancis enggau Jerman.