Produk ngangkatka ukir Borneo ari ROWENA laku

KUCHING: Pemungkal chap dagang Rowena gaga amat laban dagang pekayan ukir Borneo enggau pua kumbu udah rembus ngagai menua luar.

Rowena Cliffton madah, produk ari chap dagang ngangkatka nama iya empu nya kala dibeli orang menua luar.

Ku iya, nya nyengkaum sida ari United Kingdom (UK), United States (US), Pakistan, Singapore, Brunei lalu bisi mega ari Semenanjung enggau Sabah kelimpah ba Sarawak ditu empu.

“Entara produk chukup mayuh peminta baka skirt, baju ukir Borneo, sengkabung mua, kantung digaga ari wi enggau aksesori manik.

“Aku semampai nerima udar ari bala penguna sekalika ari menua luar enggau menua tu empu bepun ari taun 2018 nyentuk diatu.

LANDIK BEDAGANG… Rowena ngena baju ukir pua kumbu ti dikerindu bala penguna.

“Sida ke meli madahka diri chukup tepantup ati laban skirt enggau baju bisi kualiti, sida muji chura enggau ukir manah sereta manding dipeda.

“Chukup temegah sereta gaga amat ati laban orang rinduka keranjai jari aku kelebih agi dagang bepelasarka ukir asal Iban baka pua kumbu.

“Terima kasih ke sukung bala penguna ke udah meli produk ari Rowena sereta meri timbal ke chukup manah lalu udah nganjung gambar kelai gaga bekenaka produk aku.

“Sukung kita beguna amat nentuka kami ulih nyendiaka mayuh agi produk ke tau narit ati dudi hari,” ku Rowena ngepunka randau enggau Suara Sarawak.

BEMACHAM PRODUK ASAL

Peranak asal Betong ti udah bedagang kenyau ari taun 2018 tu madahka kain ukir pua kumbu tauka Borneo nya dibeli iya ari pemekal di selampur menua.

Naka diatu, bemacham bansa produk udah dijual Rowena baka skirt ukir Pua Kumbu, baju ukir pua kumbu, sengkabung mua ukir pua kumbu, skirt enggau baju batik.

Rowena mega bisi nyual cardigan digaga ari kain pua kumbu, kantung tenun enggau wi sereta aksesori manik.

Bekenangka baru lebuh ngepunka dagang tu, Rowena madahka diri ngepunka dagang tu beduduk ari iya empu rindu bekenaka skirt enggau baju ukir pua kumbu.

“Kebuah pia laban ukir pua kumbu nya mandangka ukir asal kitai ba Sarawak tu lalu ari nya tadi, aku keran deka ngangkatka ukir asal ngagai menua luar.

“Aku mungkal dagang tu laban keran deka meda asil dagang skirt enggau baju ukir pua kumbu diterima datai ba tikas tinggi agi sereta dikelala ba serata dunya.

“Kebuah pia laban ba penemu aku, ukir asal kitai tu endang chukup manah sereta nyelai.

“Tambah mega kain pua kumbu tu chukup dikerindu mensia mayuh kelebih agi ba menua luar.

DUNYA DAGANG… Rowena begambar ungkup kenang enggau bala pemenang International Borneo Festival Sarawak Edition

“Ambika banding, orang ribai suah amat ngelawa menua kitai laban deka berati enggau belajar budaya kitai Iban di rumah panjai kelebih agi indu Iban di rumah panjai endang landik begagaka pua kumbu.

“Ari nya tadi, kitai ulih nemu peranak menua luar endang rinduka pemanah sereta penyelai ukir asal kitai Iban lalu tu mih peluang aku ngangkatka budaya kitai Iban nengah dagang Rowena tu.

“Lebuh nerima udar ari bala penguna di menua luar, asai ati aku endang chukup temegah tang terubah nya tadi enda nyangka ga produk aku narit ati sida.

“Bepun ari taun 2018, Puji Tuhan dagang aku makin laku dataika untung manggai RM25,000 sebulan lalu produk pemadu laku naka diatu skirt, baju ukir Borneo enggau Batik,” terang Rowena.

DIKERINDU… Rowena begambar ungkup kenang enggau bala penguna ke udah meli produk iya rambau sebengkah eksibisyen ba SME Corp event 2018 ba Palan Aum Besai Borneo Kuching (BCCK).

PENGUJI

Ku Rowena, ba genap pengawa dikereja kitai endang bisi penguji kelebih agi pedagang laban penguji nya tau ngasuh kitai kering agi ngemansangka dagang ngambi nyapai juluk tauka tagit dikeingin ati.

Baka pedagang bukai, Rowena madahka iya mega napi bemacham penguji sebedau mujur dalam dagang.

Tu nyengkaum pemar lebuh ngelakuka produk nentuka produk dijual iya dikelala ba serata menua.

Nambahka nya, iya mega madah mesti nambahka puku dikena ngaga promosyen lalu semampai nambahka penemu baka penemu bedagang nengah online kelebih agi maya pandemik.

Terang iya, penemu bedagang chara online tu beguna amat nentuka produk kitai ditemu orang bukai kelebih agi maya pandemik Covid-19 tu.

GAYA MODEN… Kantung ukir pua kumbu enggau ukir Borneo mega entara produk dijual di Rowena.

“Pia mega, aku napi pemar baka pengawa nganjung produk nengah pos bisi laun mimit datai ba bala penguna ti jauh kelebih agi maya pandemik.

“Kala mega aku nerima sebana ari bala penguna madahka produk diudar sida laun datai.

“Tang aku lantang ati laban mayuh penguna meretika utai ke nyadi lebuh produk laun datai ngagai sida.

“Maya pandemik tu, baka pedagang bukai aku mega kala nerima bantu sekali terima ari Perintah Sarawak.

“Enggau peluang tu, aku meri besai terima kasih ngagai Perintah Sarawak laban udah nyendiaka agih belanja ngagai semua pedagang di Sarawak maya pandemik tu.

“Baka orang bukai mega, kami bala pedagang endang napi penusah baka dagang kusut sekumbang pandemik tu laban bala penguna enda ulih bebelika barang baka selama sereta ngelawa kedai kami.

“Nengah teknologi digital aja mih endur kami ngelakuka produk ngambi semampai dikerindu bala penguna sereta nentuka sida nemu nyema kami bisi mansutka produk baru,” ku iya.

PRODUK BEKUALITI

Rowena berasai lantang endar laban dagang iya semampai laku kenyau ari taun 2018 ke alai ninting hari bisi aja penguna meli produk iya.

Nambahka nya, iya mega nerima mayuh peminta dataika stok produk jampat abis.

Ku Rowena, bala penguna chukup gaga udah meli produk iya dataika sida nganjung gambar bekenaka baju nya.

“Bisi kedua nadai belampung ati bekunsika gambar nya ba Facebook pages ROWENA kelai sida gaga bekenaka baju nya.

“Naka pengaga asai ati lebuh nerima timbal ari bala penguna sereta sida ti sanggup nganjung gambar nya chukup besai reti ba aku laban udah nyukung dagang aku tu.

PRODUK ASAL… Kantung digaga ari wi mega entara produk ke chukup nyelai dijual Rowena.

“Bisi mega betesau ngagai bala kaban sereta bakih sama gawa ngambi sama bebelika produk dijual aku baka skirt enggau baju.

“Timbal ke manah ari bala penguna baka pemanah jait sereta kain ti nyamai dikena udah meransang aku ransing agi mansutka produk baru ti bekualiti.

“Terima kasih nuju semua ke udah nyukung aku kelebih agi kami sebilik enggau bakih aku semampai meri jaku peransang sereta bala penguna ti udah bebelika produk aku lalu enda belampung ati betesau ngagai bala bukai.

“Ditambah enggau pengingin ati aku empu deka ngemansangka produk Sarawak ngagai tikas ke tinggi agi sereta diterima ba serata dunya,” terang iya nyentuk.

Nambahka nya, iya ngelakuka semua produk nengah website www.rowena.shop enggau Facebook Pages ROWENA sereta Instagram Page ROWENA.

KENANG… Rowena begambar ungkup kenang enggau bala pemekit International Borneo Festival Sarawak Edition 2020

Mulaika kenang keterubah bedagang, Rowena madahka diri semina ngena puku mimit aja.

“Terubah suba semina aku kediri aja bejait lalu aku mega bedagang ari rumah.

“Nyau kelama, majak mayuh udar diterima ari bala penguna dataika aku empu enda tetangkupka peminta sida.

“Puji Tuhan, dagang aku makin mujur berekat sukung ari semua kelebih agi kami sebilik enggau bakih aku sereta bala penguna ke udah meli sereta rinduka kualiti produk dijual aku.

“Diatu aku chukup gaga ati laban udah bisi opis, pengereja, tukang jait kediri sereta lebih ari 50 iku agent enggau dropship ti dipilih ngambi bejualka produk aku ba selampur Malaysia.

“Nyadi, dropship enggau agent aku diatu lebih ari 50 iku iya nya di Sarawak, Sabah enggau Semenanjung.

“Enggau chara tu, aku ulih mansutka mayuh agi produk bukai dudi hari enggau saup ari bala agent sereta ulih mega nyaup sida nambahka penatai pemisi,” ku tuju ati Rowena.

JULUK ATI

Ngelansa silik, Rowena madahka iya ngembuan juluk ati deka meda produk iya enggau produk pedagang bukai di Sarawak ulih diterima sereta rembus ngagai makit dunya.

Besai amat pengandal iya ulih nyendiaka pengawa puang ngagai graduet ke apin bulih kereja enggau sida ke deka ngiga belanja tambah nengah pengawa dagang tu enggau chara bejualka produk Rowena tu.

Ba lansa sama, sekumbang ba dunya dagang tu Rowena suah dikangau ngulu sebengkah program baka kala dikangau ngulu International Borneo Festival Sarawak.

Ba pengawa nya, iya dikangau ngambi mandangka produk iya ngagai tikas entarabansa di London nengah Finalist tauka Ambassador International Borneo Festival Sarawak.

Nangkan nya, SME Corp mega kala ngangauka iya ngatur eksibisyen maya pengerami diatur SME Corp nya.

LIAT ATI… Rowena empu bekenaka skirt panjai ukir pua kumbu.

“Diatu, aku benung nampung pelajar tikas PhD ba Universiti Malaysia Sarawak (Unimas) ngambi ngaga pansik bekaul Women Entrepreneurship tauka Penau Raban Indu Dalam Dunya Dagang di Sarawak.

“Sebedau tu, kala mega aku nerima Geran Pansik Tan Sri Empiang Jabu dikena ngaga pansik ungkup pelajar tikas PhD aku ari UPM-SIDS ungkup pansik bekaul penau raban indu dalam dunya dagang.

“Dudi hari, aku ngarapka diri makin mansang ba dunya dagang nengah online nitihka pemansang teknologi digital kemaya hari.

“Kebuah pia laban aku keran dekaka produk tu muntang dikelala mensia mayuh ukai semina ba menua tu aja tang ulih dikelala datai ba tikas dunya.

“Pengudah tembu PhD tu, aku deka bekunsika penemu tauka meri kus sentang chara bedagang ngagai pedagang baru.

“Nengah chara tu, sida ulih nemu seling enggau kuing dalam dunya baru nentuka sida ulih beretan kelebih agi ngiri penemu sentang bedagang chara baru nundaka pemansang dunya,” ku Rowena nyimpul randau enggau Suara Sarawak.

LAKU… Entara skirt koleksyen Gawai pemadu laku dijual.

 

DIKERINDU BALA PENGUNA… Peplum Sleeveless Top ukir Pua Kumbu ti jampat amat abis stok

 

Suara Sarawak