Produk Sarawak berega di Eropah

KUCHING: Produk pemakai Sarawak ngembuan rega tambah ti chukup manah kelebih agi ba makit Eropah.

Sapit Kepala Menteri ti menga nyadi Dagang Entarabansa enggau Industri, Terminal enggau Pemansang Orang Dagang (Mintred) Datuk Amar Awang Tengah Ali Hasan madahka penambah ba produk halal meri peluang ngagai kompeni Sarawak nyapai tagit makit Eropah ti seruran ngiga produk halal ngambika ulih nambahka guna peranak Islam ti majak nambah ba Eropah.

“Sarawak diatu benung ngemansangka sambung industri produk halal laban Sarawak ngembuan peluang ti ulih ngemenuhka guna pengawa dagang baik nya ba renggat ulu, tengah tauka ili.

“Tu mega nyadi inisiatif kami ngerembaika industri pemakai ti ulih mantu dunya kelebih agi jemah ila,” ku iya lebuh dirandau pemberita di Jerman.

Nangkan nya ku iya, opis menteri iya seruran meri fokus ngagai pengawa betanam betupi sereta bioteknologi ti ulih mutarka pemar industri ke diatu.

PRODUK SARAWAK… Awang Tengah (duduk dua kiri), Naroden (duduk dua kanan) enggau bala deligit Sarawak ke bukai mandangka produk F&B menua ba Anuga 2019.

“Pekara tu ketegal ari kaul enggau pengawa nyaga rampa menua sereta ngelindung ubah ba gaya hari ti patut seriris enggau peminta sida ke meli,” ku iya.

Awang Tengah mega madah, opis menteri iya begulai enggau Kaunsil Pemansang Dagang Luar Malaysia (Matrade) bekerejasama dalam ngelakuka pengawa dagang ba rantau tu lalu ngerembaika agi kaul pengeluar menua di Kesatuan Eropah (EU).

Berebak enggau nya, rambau eksibisyen dagang Allgemeine Nahrungs Und GenuBmittel Ausstellung 2019 (Anuga) ti diatur di Cologne Jerman berengkah ari 5-9 Oktober tu siti ari chara ngelakuka produk pemakai enggau utai irup (F&B) ngagai makit Eropah.

Taun tu, Anuga sekali agi ngaga rikod baru alai urung 7,500 penyereta ari 106 menua enggau eksibisyen nya.

Lebih 50 kompeni Malaysia nyeret Anuga, lalu tiga ari kompeni nya ari menua Sarawak ti diatur Mintred.

Nya alai, Awang Tengah ngelalau ngambika mayuh agi kompeni Sarawak ulih nyereta pengawa nya ba maya ti deka datai.

Ba lansa ke sama, Menteri Betanam Betupi enggau Pemakai Jerman Julia Klöckner madahka eksibisyen nya ulih meri saut ngagai tanya bekaul enggau tuju industri pemakai dunya.

“Anuga tu siti ari pengawa meri basa ngagai sida ke udah bebendar nyaga pengelikun sereta kualiti pemakai kitai.

“Anuga udah nyadi pelasar ti manah dalam industri pemakai pengelama satu abad,” ku iya lebuh pengerami ngintu 100 taun Anuga nya.

Rambau eksibisyen Anuga ba Jerman, bela nyereta diligit Sarawak Menteri Muda Mintred Datuk Mohd Naroden Majais, Sekretari Tetap Mintred Datuk Liaw Soon Eng lalu diiring Direktor Kaunsil Pemansang Pemeranak Puku Malaysia (Mida) di Frankfurt Yusri Hasnan Chu Abu Bakar enggau Direktor Matrade Sarawak Leany Mokhtar.