SAPA nyangka ketegal meda video ba Instagram mujur ngubah nasip siku pengintu ruang bilik nyadi pedagang nyulut.

Semua nya bepun lebuh iya benung duduk belelak ba rumah sambil bemain telefon baka orang bukai.

Nyau pemuas nyerungkai bemacham gambar enggau video ti dikunsika ba sebelah Instagram, enda memukai iya tetemuka siti video ti mujur ngubah pengidup iya 180 darjah.

LABUH PENGERINDU

Pekara nya nyadi ba taun 2019 lebuh Sylvia Eirlyn Andoh tepedaka siti video orang nyulam lalu enda berasai iya pen nyau labuh pengerindu meda asil sulam nya.

Pemuas beratika bemacham asil sulam nya, Sylvia chukup temegah meda pemanah, penyelai sereta kreativiti orang Brazil enggau India nyulam.

Semua asil sulam nya chukup manah, bekualiti enggau engkeman dikena ngias rumah tauka nyadi tepa.

Pengerindu besai ba pengawa seni enggau pengagit deka belajar pekara baru, dia deh Sylvia mutus ati belajarka seni nyulam.

Seraya mulaika kenang manis maya agi sekula suba, iya nusui diri minat amat nero enggau ngechat sekali ke ba atas kain tauka ba keretas.

NYERUNGKAI PEKARA BARU

Nya alai, berengkah ari nya, anak tuai ari empat diri menyadi nya ransing nyerungkai chara nyulam enggau pekara bekaul ba sebelah media rama enggau internet.

Ba taun sebaka, iya berengkah belajar chara ngaga bungai sulam ngena ubung enggau chara nero garis sulam.

Maya nya suba, iya agi gawa laban ti kiruh gawa ngujung ke iya nadai ngembuan awak ti chukup dikena nyerungkai pekara nya silik agi.

Taja pia, pengiruh gawa nya enda nekul iya belajar nyulam laban maya lapang iya sigi enda ditempayaka iya pia aja.

RANSING BEDAGANG

Ba taun 2020, nadai siku orang ulih meragam pekara ti deka nyadi maya nya suba lebuh menua dituntung pengerekai pandemik COVID-19 ti mai pangka besai ngagai semua orang.

Semua aktiviti mensia ninting hari pen diketu tekala nya lalu atur mindah betagang (PKP) terit dipejalai.

Mayuh orang diketuka gawa laban kompeni enggau ekonomi balat amat kusut nerima empas ari pekara ti nyadi maya nya suba.

Pengudah ngetu gawa rambau jeman PKP suba, Sylvia berengkah ngaul diri ba dagang online nyadi dropship.

Laban rayat nyau nadai pun penatai pemisi ketegal diketu gawa, bemacham inisiatif dipejalaika perintah dikena mantu rayat diri kelebih agi raban B40.

Siti ari inisiatif nya baka meri pemendar ngagai rayat ngeluarka duit Gerempung Wang Turu Pengereja Pengawa (KWSP) sida.

Ngena peluang nya, Sylvia ngeluarka duit KWSP diri sepenyampau RM5,000 nyadi turu dikena ngepunka dagang mit.

Iya berengkah bebelika bemacham perengka dikena ngepunka dagang diri ari duit asil titik peluh iya empu ngelama tu.

Ba bulan April 2020, iya berengkah ngaga produk diri baka choco jar, bouquet enggau servis nganjung ngenyit ba selampur Miri.

NGERANDANG DAGANG

Kelimpah bejalaika dagang diri, Sylvia madah, ba maya sebaka, iya bela belajar nyulam bepelasar ke video ari YouTube, media rama enggau internet.

“Asil sulam keterubah ti mujur digaga aku iya nya sulam gaya kalinda sereta bisi nama orang ungkup tepa hari pengada.

“Taja pen asil keterubah tu agi bedau kemas tang aku chukup gaga enggau temegah ati laban mujur ngasilka produk sulam kediri empu.

“Urung tujuh bulan udah nya, dia deh pengelandik aku nyulam majak manah, kemas enggau kreatif agi.

“Pandak jaku, aku udah nguasa chara nyulam ti semitan kelimpah pintar ngaga kreativiti kediri empu,” tusui iya.

12 September 2020 nyadi haribulan berega ti ngundan pengingat manis ti semampai dikenang iya nyentuk diatu.

Kebuah pia laban Sylvia mujur nyual asil sulam keterubah ngagai siku bakih iya nyadi tepa hari pengada.

Udah nya, produk sulam Sylvia majak dikelala enggau nerima mayuh peminta ari bala penguna ti tepantup ati enggau asil keranjai jari iya.

Enggau ati ti berat, Sylvia ngetu bedagangka produk choco jar laban nyau kiruh ngatur dagang sulam enggau servis bouquet.

“Peminta penguna ngagai produk sulam enggau servis bouquet majak nambah nyentuk iya nyau enda tentu alah nangkup peminta penguna ngagai ketetiga dagang tu.

“Nya alai, iya enggau ati berat ngetuka dagang choco jar ngambi ulih meri perati penuh ngagai dagang sulam enggau servis bouquet,” terang iya.

Pengudah dua taun bejalaika dagang nya ba Bagi Menua Miri, dia deh Sylvia lalu mindah ngagai Nengeri Sembilan nitihka laki iya gawa din.

Berengkah ari nya nyentuk diatu, iya bejalaika dagang sulam nya ba Nengeri Sembilan.

JAMPAT BELAJAR

Minat nyadi pekara besai dikena nentu pemujur genap orang laban ketegal minat meh orang deka ransing belajar enggau nyerungkai siti-siti pekara tauka pengawa.

Ambi ke chunto, minat Sylvia ti besai ba pengawa nyulam nya mujur ngerandang dagang ngagai iya empu kelimpah nyadi siku pedagang nyulut.

Nya kebuah iya rindu belajar chara enggau bemacham pekara bekaul pengawa nyulam lalu iya jampat belajar.

Pemansang teknologi digital kelebih agi nengah pelasar media rama baka YouTube, Facebook, TikTok, Instagram enggau Internet meri pemaik ngagai iya belajarka bemacham chara nyulam.

Taja pen semina belajar nengah media rama aja tang iya jampat mereti enggau belajarka chara nyulam ti semitan.

Pemanah asil sulam nya bepanggai ba pengelandik enggau kreativiti genap orang.

Ngelansa silik, Sylvia madah, enti deka pintar nyulam, kitai meseti dulu belajar chara pemun bejait baka straight stitch, woven oval, leaf stitch enggau ti bukai.

ENDA AMU PENEMU

Anak tuai ari empat diri menyadi nya chukup gerah jari bekunsi penemu enggau pengelandik dikembuan diri.

Lebuh orang bukai deka belajar nyulam, iya enda belampung ati ngajar enggau bekunsi penemu dikembuan diri enggau sida.

Iya madah, pekara manah patut dikunsi enggau orang bukai laban lebuh kitai merekatka orang bukai, kitai mega deka lebih diberekat.

“Entara perengka ti diguna maya nyulam baka kain linin, bingkai sulam, ubung bemacham chura, guntin mit, pen bansa Frixion enggau jarum bemacham pemesai.

“Enti ubung, aku sigi ngena ubung khas ungkup nyulam ti ngembuan chap DMC lalu semua perengka tu dibeli aku ba Shoppe tauka kedai kraf.

“Kelimpah ari ngajar orang bukai chara nyulam, aku mega bisi nyual perengka dikena nyulam,” terang iya.

Entara produk sulam digaga iya baka nama + quote, kalinda, newborn bio, blooming + garden alphabet, battery wall clock, polaroid frame enggau gambar ilustrasyen.

Pia mega, iya bisi ngaga perengka dikena ngengkah tinchin ungkup pengawa melah pinang tauka betunang sereta emas kawin.

Rega produk sulam nya bepanggai ba pemesai enggau pemar ukir dipinta bala penguna.

Produk sulam ti mit tauka 15 sentimeter (cm) pemesai berengkah dijual enggau rega RM73 siti lalu pemadu besai kala dijual iya nya 30cm manggai lebih RM300.

REMBUS MAKIT MENUA LUAR

Sylvia berengkah bejalaika dagang sulam nya kena 12 September 2020 nyentuk diatu sereta chakah ngelakuka produk nya ba bemacham pelasar.

Nya nyengkaum ba sebelah media rama baka Facebook, Instagram, TikTok enggau WhatsApp kelimpah meri kad dagang ngagai diri sebilik, bala bakih, kaban belayan enggau mensia mayuh.

Keterubah suba, nadai mayuh orang meli produk sulam nya laban produk nya agi baru lalu mensia mayuh apin ngelala.

Taja pia, pekara nya enda ngasuh Sylvia mantul sereta majak chakah ngelakuka produk diri ninting hari.

Berekat pengeransing enggau pengepuh iya ngelakuka produk diri ngelama tu, dia deh produk sulam iya majak dikelala enggau nerima mayuh peminta.

Tebal agi bala penguna meli produk sulam nya nyadi tepa ungkup orang dikesayau sida tauka dikena ngias rumah kelimpah ulih nyadi perengka dikena ngengkah tinchin betunang enggau nikah.

“Produk tu ukai semina nerima timbal manah ari bala penguna ba Sarawak aja tang selampur Malaysia.

“Lebih ngemegah, lebuh produk aku mujur rembus makit menua luar baka Singapore enggau Brunei.

“Aku enda nyangka timbal ari mensia mayuh chukup manah nyengkaum penguna ari kededua menua luar tu.

“Ba aku, tu siti berita manah ngelai produk tu ngembuan tunga kuing ti tampak dudi hari,” ku iya seraya mandangka pengaga diri.

Ukai naka nya aja, Sylvia diatu bisi ngembuan lisin bedagang kediri empu lalu kompeni iya diberi nama Eirlynowls Resource.

Iya semina bejalaika dagang online diri ari rumah aja.

ANDAU PENGUJI

Enda ngira nama pengawa dikereja, genap kitai bela niti andau penguji kediri empu dikena nyapai penyulut.

Kitai enda ulih nyeliahka diri ari nujah andau penguji nya tang kitai ngembuan pemintar enggau ati ti liat dikena napi semua nya.

Siti penguji besai ditapi Sylvia sekumbang ngaul dagang nya suah nyadi tagit bala scammer ti enda beradat.

“Bisi sekali scammer nyaru diri nyadi penguna aku deka meli tepa ngagai bakih iya ba Pulau Pinang lalu iya madahka diri chukup tekait ati meda pemanah enggau penyelai produk sulam aku.

“Aku andal sereta temegah ati laban penguna ari menua Jerman nya deka meli produk aku lalu tu ngelai produk aku udah dikelala orang ba Jerman.

“Keterubah aku nadai nyangka nama-nama tang enda memukai, penguna tu minta email aku enggau ngasuh aku mayar RM1,000 dulu dikena ngeluarka duit bayar produk tu.

“Aku alit ati enggau bisi pengirau bekaul pekara tu, dia deh aku berumban betanya ngagai siku bakih aku ti gawa nyadi pegawai polis lalu iya madahka nya scammer.

“Udah nya, penguna tu tadi ngemba aku laban enggai nitih peminta iya seraya madahka diri udah mindahka duit ngagai aku tang aku nadai nerima sebarang duit ari sapa-sapa maya nya.

“Aku pen ngemba iya baru madahka diri deka ngeripot polis lalu berengkah ari nya, scammer nya tadi nadai ngachau aku agi,” tusui Sylvia seraya ngelalau mensia mayuh seruran bejimat.

Nambahka nya, ku iya, jari dituchuk jarum maya nyulam nya endang peneleba suah diasaika iya kelimpah napi pemar ngatur bungai sulam ti kelalu pisit.

Pia mega, urup ti kelalu mit ulih ngasilka asil ti enda manah enti kitai salah ngatur garis ubung nya tadi.

“Pengawa nyulam tu begunaka pengeliat ati ti besai, penyilik, pemintar enggau runding ti kreatif,” ku iya nyemetak.

JAUH TINJAU

Pedagang nyulut nya madah, iya deka ngerembaika produk dagang diri dudi hari sereta nyelinting makit antarabansa ti besai agi kelimpah ari makit Singapore enggau Brunei.

Iya madahka diri deka ngena produk ti endang udah bisi ba makit baka kantung, topi, baju enggau ti bukai lalu nambahka seni sulam ba produk nya.

Reti nya tadi, produk ti endang udah bisi nya deka digaga baru enggau dikemadaska agi nyadi sebengkah produk ti baru.

Taja pia, ku iya, nya benung ba renggat perambu lalu ngarap pekara nya ulih dikeamat dudi hari.

“Aku meseti pintar ngena peluang ti bisi, kreatif enggau inovatif ba mayuh pekara,” ku iya.

TIBAR PERANSANG

Penyulam profesional nya ngelalau mensia mayuh ngambi berani nyendia puku dikena ngepunka dagang diri.

Iya mega ngelalau mensia mayuh ngambi berani nguji pekara baru kelebih agi pengawa dagang sereta berani napi sebarang empas sekali ke nya mai penguntung tauka pengerugi.

“Anang sesekali takut nguji laban kitai enda nemu pekara ti nyadi ba mua nyangka ari pengawa tu, kitai ulih nyadi siku orang nyulut dudi hari sereta nyadi chunto enggau peransang ngagai orang bukai.

“Aku pechaya genap kitai bisi ngembuan minat kediri empu ba sesebengkah pengawa.

“Nya alai, kemansangka minat kitai tu enggau meruan ngambi ulih meri pemaik enggau penguntung ngagai kitai empu dikena nyungkak penatai pemisi tambah.

“Diatu teknologi udah maju, kitai ulih ngena pelasar digital dikena belajar pekara baru enggau ngelakuka dagang.

“Pekara ti beguna iya nya enda mudah nyerah alah, liat ati, ransing belajar enggau ngembuan tuju ti tampak,” ku lalau Sylvia.

Ngena peluang berega tu, Sylvia beterima kasih ngagai apai indai iya ti chakah nyendia palan dikena iya bejalaika pengawa nyulam ba Miri enggau nyukung penuh dagang iya.

Iya mega beterima kasih ngagai sida sebilik, bala bakih enggau kaban belayan ti seruran nyukung sereta begempung ngelakuka produk sulam iya.

“Bejuta terima kasih kelebih agi ngagai bala penguna ti enda leku nyukung enggau ngelempai pengandal ati ngagai produk dagang aku ngelama tu.

“Terima kasih mayuh-mayuh laban enti ukai sukung ari kita semua, dagang aku enda ulih beretan lama enggau manggai ba tikas baka diatu,” ku iya.