KUCHING: Perintah Sarawak terus ransing nambahka profesionalisme bala kunteriktor ngambi bisi penau enggau ulih besemekih maya bejalaika kereja ti dilempai.
Sapit Premier Sarawak, Datuk Amar Douglas Uggah Embas madah, nentuka pengawa nya seruran bisi nambah ba rejister, prestasi enggau pemansang bala kunteriktor, Opis Sekretari Pekara Wang Nengeri (PSKN) begunaka pengawa kunsi ke tegap enggau industri berumah.
Berindik ari Kaunsil Pemansang Industri Berumah (CIDB) udah ditumbuh enggau meruan, iya pechaya pengawa kunsi enggau CIDB patut ditarak ngagai tikas ke manah agi.
“Nya meh kebuah patut endar diatu kitai meri terima kasih ngagai CIDB laban setuju bekerejasama enggau PSKN dikena nambahka penau kunteriktor kitai ari sukut profesionalisme, atur pengawa nyengkaum ba pekara wang ngambi ulih matau semua projek dipejalai enggau manah.
“Lalu aku ngarap ke projek tejanggal ulih dipejalai dalam timpuh pandak tauka dirumba sereta nadai agi penanggul baka nyadi,” terang iya.
Uggah bejaku munyi nya lebuh dirandau pemberita pengudah ngemata pengawa nyain Sempekat Pemereti Ati (MoU) entara PSKN enggau CIDB di Kuching ditu ensanus.
Nengah kerejasama strategik entara PSKN enggau CIDB nya, iya andal ke kunteriktor bumiputera deka ulih nyapai status kunteriktor seikas dunya.
Dulu ari nya lebuh bejaku, iya madah ke PSKN nyadi raban bekuasa ti rejister kunteriktor ngambi sida ulih bejalaika projek perintah.
“Raban kunteriktor ti deka ngambi bagi dipinta rejister enggau Unit Pengerejister Kunteriktor Enggau Juruperunding (UPKJ) dikuasa PSKN.
“Ngambi peluang ari pengawa rejister nengah tali arus ti udah dipejalai, UPKJ deka ngena Portal Kontraktor Malaysia (MCP) raban CIDB ungkup pengawa rejister kunteriktor.
“Ari nya, penerang ari pengawa rejister kedua CIDB enggau UPKJ tau dipindah ari MCP ngagai Modul Permohonan Dalam Talian (OLAM) ti dikena kunteriktor minta rejister UPKJ ba nengeri tu.
“Tu deka madamka pengawa beserak lebuh ngemasukka data ti begunaka awak enggau nentu data nya diaku,” ku iya.
Sama datai Sapit Sekretari Pekara Wang Nengeri Sarawak, Hasmawati Sapawi, Tuai Eksekutif CIDB Malaysia, Datuk Ir. Ahmad’ Asri Abdul Hamid enggau temuai dipebasa ke bukai. -EDISI UKAS
