SARATOK: Tim Ali Biju nampung program bejalai ngabas rayat ba Rumah Selaka, Bratong, Roban.
Sapit Menteri Pengeluar Kuasa enggau Pengeraja Asal, Ali Biju madah, program bejalai baka nya beguna amat nentuka kaul rayat enggau pengari sida meruan rat ditanggam kelimpah nya endang udah pangku pengawa enggau tanggungpengawa nyadi pengari rayat.
“Aku deka seruran ngabas kita, ngatur randau mendingka empu nama bagi peminta, penanggul enggau penusah kita ngambi aku ulih berunding chara nangkup peminta enggau mutarka penanggul tauka penusah ditapi kita.
“Taja sekumbang pengerekai Covid-19 tu mayuh pengawa tejanggal tauka laun dikereja, tang kita anang irau laban semua pengawa udah dilanggur tetap dipejalai baka selama, nitihka Atur Standard Pengawa (SOP) udah ditetapka perintah,” ku iya.
Ali mansutka jaku nya lebuh dipebasa bejaku ba mua mayuh rambau pejalai nemuai nyerumba Program Randau Enggau Raya ba Rumah Selaka, Bratong, Roban ditu, pagi kemari.
Iya madah, ngena peluang baka nya rayat ulih nanya empu status peminta sida kelebih agi pasal projek pemansang sekalika ba infrastruktur pemun, pelajar, ekonomi rama nyengkaum bantu enggau subsidi betanam betupi.
“Kenataika peminta enggau sebana kita, padah ngagai aku nama bagi utai diguna ba rumah panjai kita, ke apin bisi diterima kita.
“Anang sanggu, enti kita enggai baum dulu enggau tuai rumah lalu iya deka mantaika srmua peminta nya ngagai aku tauka staf ba Palan Servis Komuniti Sitak Parlimen Saratok din. Tu mih peluang kita minta hak diri empu,” ku Ali madah nyemetak.
Berebak enggau nya, iya udah ngagihka belanja di baru Projek Mit Pemansang Menua Pesisir (MRP) penyampau RM15,000 ngagai Komiti Pemansang enggau Pengelikun Genturung Pendiau (JKKK) rumah panjai nya seraya RM5,000 ngagai Biro Indu sida.
