Program “Borneo From Above” ba TVS chukup narit ati

KUCHING: Kepala Menteri Datuk Patinggi Abang Johari Tun Openg muji tusun program “Borneo From Above” ba TVS nengah channel 122 Astro.

Kenu ku iya, program tu mandangkan pemanah rampa menua Sarawak ari langit diambi ngena dron chukup manah.

“Aku chukup rindu meda program “Borneo From Above” ti mandangka ubah menua Pelilih Serian dipeda ari atas dalam program TVS sebedau tu.

“Tu amat manah lalu ulih nyadi produk dagang temuai Sarawak,” ku iya rambau bejadika Konvensyen SUPP ditu kemari.

Ku Abang Johari, nengah TVS, mayuh rayat Sarawak ulih belajarka jaku bansa bukai baka Iban enggau Mandrin.

“Kebuah pia laban TVS bisi mandangka empat jaku iya nya Iban, Mandrin, Melayu enggau English.

“Kelimpah ari nya, Sarawak mega deka nyadi nengeri pemadu maju ba Malaysia manggai taun 2030. Nya alai, dalam polisi ekonomi, kitai deka fokus ngagai empat bidang besai,” ku iya.

Ku iya, keterubah pengelebih bisi belanja udah Petronas sanggup mayar SST.

“Kedua, negika hak dalam industri minyak enggau gas lalu ketiga, ngemayuhka penatai pemisi dikena ngiga belanja tambah.

“Kitai ulih bulih penatai pemisi tambah tang nganti udah pengawa bepilih nengeri baru aku madah,” ku iya.

Tandu iya, keempat kitai deka ngemansangka penau anak Sarawak.

“Nya kebuah aku numbuhka TVS laban aku nemu anak Sarawak bisi penau ba bidang seni enggau main asal.

“Ambika chunto penanyi tebilang Dayang Nurfaizah, Hafiz AF enggau Bob AF endang anak Sarawak. Miss Universe 2020 (Fransica Luhong James) enggau Miss World 2019 (Larissa Ping) mega asal ari Sarawak.

“Anak Sarawak mega ulih juga berjaya menempah nama di industri hiburan di Hong Kong. Sepatutnya mereka ini harus dikenali melalui TVS,” katanya.

Abang Johari madah, mayuh anak Sarawak gawa di Singapura.

“Sebedau tu aku bisi betemu enggau siku eksekutif ngaga tekat di Marina Bay, Singapura.

“Tikas pengawa iya dalam opis lumur dua tinggi lalu iya madah diri asal ari Bintulu,” ku iya.

Kenu ku iya, pekara tu nyadi laban nadai peluang ekonomi ba Sarawak.

Nya alai, ku Abang Johari, Perintah Sarawak deka ngemanah agi peluang pengawa awakka ulih mai pulai sida ke biak landik gawa ba Sarawak.

Suara Sarawak