Program BTS 2021 ngelempungka belanja anak nurun sekula

SARATOK: Nembiak Sekula Primari (SK) Ulu Budu, Krian ditu udah nerima pemeri kereban besekula nengah Program Nurun Ke Sekula (BTS) 2021.

Sapit Menteri Pengeluar Kuasa enggau Pengeraja Asal, Datuk Ali Biju madahka program nya datai ari kerejasama rat entara Palan Servis Komuniti Sitak Parlimen Saratok enggau Tenaga Nasional Berhad (TNB).

Ku iya, urung 1,500 iku nembiak ari ruang bilik kurang penatai pemisi ba pelilih nya udah dikelala deka nerima pemeri ke sebaka enggau tuju nyaup apai indai nyendiaka kereban sekula bala anak.

“Kitai ditu benasip endar laban raban TNB udah gerah jari sereta nadai bekira lebuh nyaup ngemujurka program BTS 2021 ti dikeandal meri pemaik ngagai raban diselinting.

“Aku pechaya, apai indai ukai semina berasai lempung ari sukut belanja tang mega nerima pemeri tu enggau ati lantang kelebih agi sida ke mayuh anak dipelanja,” ku iya lebuh dipinta ngelansa pasal pejalai program BTS sekali tu.

Ali diarika raban ari Palan Servis Komuniti ti betuaika Laga lebuh nyuaka bantu ngagai SK Ulu Budu ti diterima Kepala Pengajar Dick Patrick.

Sepenyampau 31 iku nembiak SK Nanga Malong mega udah nerima kereban sekula sida ke alai Chairman Serakup Apai Indai enggau Pengajar (PIBG) Tuai Rumah Insol ngarika sida nerima pemeri nya.

SK Lempa enggau SK Temudok, Awik bela diarika kepala pengajar sida, Sejili Eton enggau Fadreen Jingan nerima pemeri Program BTS 2021.

Berita penuh Ruai 7 pagila

Suara Sarawak