Program ‘Juh Bermukun 76 Jam Tanpa Henti’ 2022 mujur mechahka rikod lama program nya ke kala diatur iya nya bemukun pengelama 50 jam taun 2004 suba.
Nya alai, program bemukun 76 jam nya sekali agi ngerikod sejarah baru dipasuk dalam ‘Malaysia Book of Records’ lalu udah berengkah diatur pukul 5 lemai 27 Mei tu tadi di Auditorium P. Ramlee, RTM.
Pengawa nya diatur pengelama 76 jam nadai ngetu nyentuk sehari tu, 30 Mei pukul 9 malam.
Pengawa tu mega berejasama entara Opis Menteri Dagang Temuai, Industri Kreatif enggau Seni Pemerindang Sarawak enggau Opis Broadcasting Malaysia (RTM) Sarawak beserimbai enggau 100 hari opis menteri nya sereta Pengerami Ngintu Hari RTM Ke-76.
Ku Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah, urung 76 iku penyereta ari Sarawak, Sabah enggau Wilayah Persekutuan Labuan mantaika pengelandik diri bemukun enggau betanda.
Ku iya, opis menteri udah masukka pengawa bemukun nyadi sebagi ari program ninting taun baka Pengerami Gendang Sarawak.
“Tang ketegal Covid-19, kami enda ulih ngatur Pengerami Gendang Sarawak ti diatur beserimbai enggau Regata Sarawak.
“Tebal agi pengerami tu deka matak mayuh penyereta ukai semina ari bagi menua ditu tang mega ari Sabah, Labuan enggau Brunei,” ku Karim.
Karim mansutka jaku nya ba aum pemberita pengudah bejadika Pengawa ‘Juh Bermukun’ RTM ti diatur ba Auditorium RTM Kuching, apin lama ke udah.
Sebedau tu, pengawa bemukun baka tu mega kala diatur ba taun 2004 tang semina pengelama 50 jam.
Ku Karim, pengawa tu deka dipanchar terus di TV1 nengah Saluran Berita Semasa, Selamat Pagi Malaysia sereta radio baka SARAWAKfm, WAIfm enggau REDfm.
Karim madah, nipakka topik “Longest Non-stop Live Broadcasting Bermukun Performance”, pengawa nya mega dipandang terus 76 jam nadai ngetu di media rama Facebook RTM Sarawak.
Sama datai Tuai Direktor Broadcasting RTM Datuk Che Roslan Che Daud, Direktor Broadcasting RTM Sarawak Nasrul Hakim Nor, Direktor Broadcasting RTM Sabah Zulkefli Mohd enggau Direktor Broadcasting RTM Labuan Aminah Samsudin Mohd.
