Program kluster sayuk jagung di Kpg Skiat, Bau diberi sebuah traktor

BAU: Peranak Kpg Skiat ke masuk program Kluster Sayuk Jagung ba deka muntang agi ngereja pengawa sida pengudah nerima sebuah traktor ari Adun Tasik Biru, Datuk Henry Harry Jinep.

Ku Henry, traktor nya berega RM 83,000 nya ungkup 58 iku peranak ngaul pengawa betanam betupi ti dibeli ngena Wang Turu Betanam Betupi (AFF).

Belanja AFF nya diagih Perintah Sarawak nengah Opis Menteri Betanam Betupi Moden, Tanah Adat enggau Pemansang Kandang Menua ngagai Dun Tasik Biru.
“Kebendar, traktor tu disedia taun nyin kemari tang tejanggal ketegal Covid-19 laban mesti diimport ari Jipun.

“Taja pia, aku ngandalka pemisi traktor tu nentuka pengawa nanam sayup jagung ba Kampung Skiat deka chakah agi dipejalai lalu mayuh agi pengereja ungkup pengawa bukai baka nungkus enggau nyual produk nya,” terang iya.

Henry mansutka jaku nya ngagai pemberita pengudah nyuaka pusun nya ba Balai Mayuh Guna Kampung Skiat, ditu ensanus.

Ku Henry, inisiatif nya dipejalai laban bisi pengulih besai ngambi pengawa nanam sayuk jagung ba kandang menua nya ditanam chara moden.

“Nya kebuah, kami nyelinting siti utai tanam ba genap genturung pendiau baka Kampung Skiat tu dikemansang enggau pengawa nanam sayuk jagung.

“Baka ba genturung pendiau bukai, lain agi ga utai tanam dikemansang sida,” ku Henry.

Nangkan nya, iya madahka Kampung Skiat chakah ngemansangka pengawa nanam sayuk jagung tu kenyau ari berapa taun ke udah.

Henry mega ngelalau graduet enggau bala nembiak ngaul diri ba pengawa betanam betupi ke bisi pengulih besai dalam pengawa bedagang.

“Perintah Sarawak enggau Perintah Besai sedia nyaup ngemuntangka pengawa baka nyendiaka agih belanja, puku enggau bantu bukai.

“Opis Menteri Betanam Betupi Moden mega deka nyaup matau pemansang kebun tu nentuka sida ulih dikemansang,” terang iya.

Suara Sarawak