ARTIKEL

Program MOTAC@ Bintulu nyagu produk kraf, pematak temuai

Facebook
Twitter
LinkedIn
WhatsApp
Telegram

PROGRAM MOTAC@Bintulu benung richah diatu nyentuk 7 Januari 2024 tu nengah bemacham aktiviti ukai semina ngayanka penyelai produk kraf lokal tang mega mai komuniti begulai enggau pangan diri.

Kemari bisi mega diatur pengawa meri darah dikena narak pemereti ati mensia mayuh senentang pemesai guna siru ke pangan diri nengah pengawa tuchi nya.

Ba Kraf Borneo Kita serak tu udah mai empat iku pedagang kraf ari Sarawak enggau Sabah mandangka chara sida beranyam enggau nengkebang produk nya.

Entara empat pedagang kraf ti mandangka chara beranyam baka Renny@ Anna ari Keningau, Sabah nunjukka chara nganyam buluh enggau salingkawang.

KREATIF… Roslan begulai enggau pedagang anyam Buluh enggau Salingkawang, Renny@Anna nunjukka produk ti udah dianyam iya.

Pia mega, Lumat anak Labong ari Serian mandangka chara nganyam Tikai Bemban seraya Sapiah ari Kota Belud, Sabah nunjukka chara nganyam Daun Serdang.

Bisi mega Missiah ari Sadong Jaya nunjukka chara nganyam Tikai Bergerang ba Lot Demontrasyen nya.

Nya alai, mensia mayuh ditesau sampal datai nyukung produk enggau pedagang kraf lokal.

NGANGKAT MAIN ASAL

Opis Menteri Dagang Temuai, Seni enggau Main Asal ba sebengkah penerang bekaul Program MOTAC@ Bintulu madah, pelilih nya dipilih nyadi sebagi ari palan nyungkak seni main asal ba renggat baruh berindik ari pematak temuai.

Tambah mega, penatai temuai dalam menua enggau antarabansa ke Sarawak naka Oktober 2023 ngerikod 3.187 juta.

Penyelai Bintulu nyadi sebagi ari palan pematak dagang temuai Sarawak nya dikena nyapai tagit temuai menua luar iya nya 35.6 juta iku enggau penatai pemisi dagang temuai penyampau RM147.1 bilion serimbai Taun Nemuai Ke Malaysia 2026.

PUH… Lumat anak Labong asal ari Serian benung nunjukka chara nganyam Tikai Bemban.

Entara pematak ti ulih dilawa bala temuai dalam menua enggau menua luar ba Bintulu iya nya Pantai Tanjung Kidurong enggau Lambir Hills National Park.

Bisi mega Monument Council of State, Esplanade Bintulu, Taman Negara Similajau, Taman Tumbina, Pantai Temasya Tanjung Batu enggau aktiviti paragliding.

Penulin enggau penyelai peranak ba rumah panjai di Sarawak mega entara pematak temuai ba menua tu enggau menua luar.

Gaya langkar tengkebang sereta struktur rumah panjai asal ti agi teguh diatu nyadi pematak temuai datai sereta diau ba rumah panjai kelebih agi maya program homestay.

PELUANG NEMUAI

Fokus besai Program MOTAC@ Bintulu nya meri peluang enggau awak ngagai mensia mayuh nambah penatai pemisi nengah dagang, nyual produk kraf jari enggau pemerindang seni.

Ukai semina nya aja, program nya mega meri peluang ngagai peranak lokal, temuai dalam menua enggau menua luar ngelala sereta ngasaika penyelai Malaysia nengah aktiviti seni, main asal enggau pesaka asal kelebih agi mungkur komuniti Bintulu.

Kelimpah ari nya, MOTAC@ Bintulu mega nyendiaka Festival Kraf Borneo Kita ti diatur nyentuk 7 Januari tu mungkur lebih 75 pedagang kraf ari Sarawak, Sabah enggau Semenanjung Malaysia ari pengawa tekstil, asil kampung, asil tanah, asil temaga enggau bemacham kraf bukai.

Kraf Borneo Kita ti ngena konsep Ini Budaya Malaysia udah mandangka penyelai seni enggau main asal Malaysia nengah aktiviti baka ngaga produk kraf, seni enggau pesaka Malaysia ti ulih dikunsi entara nengeri ba menua tu.

CHUKUP ALUS… Sapiah benung nunjukk chara nganyam Daun Serdang.

Kelimpah ari nya, bemacham produk pemakai enggau ai irup bisi dijual ba 100 buah bansal sereta pemerindang atas panggau nengah bemacham pemerindang baka tanda, belagu, buskers enggau band lokal.

Nya alai, program besai nutup taun 2023 enggau mungkal taun 2024 nya ukai semina ngempuru pupu bansa enggau temuai tang mega nyadi penyungkak ekonomi Malaysia.

Program baka tu mega ngerandang peluang enggau awak ukai semina ngagai MOTAC tang mega ngagai pedagang kraf ngerembaika agi sayap enggau peluang sida ngagai makit antarabansa sereta majak dikelala.

Inisiatif MOTAC ukai naka tu aja laban mayuh agi perambu enggau inisiatif besai udah dilanggur deka dipejalai ba taun 2024 tu.

PENYULUT

MOTAC ti di baruh iring Menteri Dagang Temuai, Seni enggau Main Asal, Datuk Seri Tiong King Sing udah meri perati negapka sektor dagang temuai, seni, main asal sereta pesaka asal.

Sektor dagang temuai nya entara penyungkak ekonomi menua ti ulih meri empas besai nengah penambah penatai temuai antarabansa enggau dalam menua.

Indeks Penyulut (KPI) MOTAC mega tampak dipeda nengah sekeda pemujur dipenggi ngalahka menua bukai.

Seraris enggau konsep Malaysia MADANI, pengawa negapka sektor seni main asal enggau pesaka enda dikelaung dikena ngemansang komuniti Malaysia MADANI.

BECHURA… Missiah benung nganyam Tikai Bergerang ti ngembuan bemacham chura.

Berebak enggau nya, pengawa ngangkat sektor seni, main asal enggau pesaka asal chara dipejalai nengah pengawa meri geran, lisin niche enggau pelasar dagang kraf online iya nya MyCraftshoppe.

MOTAC mega meri perati ungkup perambu dudi hari nengah pengawa meri geran, insentif enggau ngerandang makit produk kraf chara digital.

Kelimpah ari nya, MOTAC benung ngaga langgur silik nyikap diri ungkup Taun Nemuai Ke Malaysia 2026 enggau tagit penatai 35.6 juta iku ti ulih nambahka penatai pemisi nyentuk RM147.1 bilion.

MOTAC mega meri perati ngagai Taun Nemuai Ke Melaka, Kelantan, Perlis enggau Perak ba taun 2024 sereta Taun Nemuai Ke Kedah, Negeri Sembilan enggau Selangor ba taun 2025.

TAUN NEMUAI KE MELAKA

Lebuh datai ba Pengerami Taun Nemuai Ke Melaka 2024 enggau Malam Taun Baru 2024 di Dataran Pengkalan Rama, Melaka, King Sing nyemetak madah, Opis MOTAC enggau Tourism Malaysia bekerejasama rat enggau Perintah Melaka ngelaku sereta ngemanah palan dagang temuai menua.

Iya madah baru, MOTAC andalka program besai nya deka nambah pematak enggau pengelaku Melaka nyadi palan dagang temuai besai ba tikas antarabansa.

Ba pengawa nya mega, King Sing udah ngemendar agih belanja tambah RM2 juta ngagai nengeri Melaka dikena nyungkak sektor dagang temuai nengeri nya.

Ke rikod, Taun Nemuai Ke Melaka 2024 berambaika jaku ‘Mana Lagi, Melaka Ler…’ nyendiaka lebih 70 program ngisi kalinda dagang temuai nengeri Melaka ba taun 2024.

-abis-

LAIN-LAIN BERITA

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

TYT berami enggau YAST Group

KUCHING: Tuai Pemegai Menua (TYT) Sarawak, Tun Wan Junaidi Tuanku Jaafar enggau bini iya, Toh Puan Fauziah Mohd Sanusi udah ngulu Pengerami Makai Lemai Taun

BERITA TERBARU

Sawit naik RM3,750 setan

KUALA LUMPUR: BMI Country Risk & Industry Research (BMI), sebuah badan di bawah Fitch Solutions Group Ltd, telah membuat semakan dan menaikkan unjuran bagi harga

JKT penolong jurulatih Kuching City FC ‘B’

KUCHING: Keterujaan buat bekas penyerang berpengalaman yang juga kapten Kuching City FC, Joseph Kalang Tie, 37, dalam menelusuri dunia bola sepak dengan persepsi berbeza. Jika

Dua sahabat didakwa cubaan bunuh lelaki

KUCHING: Dua sahabat didakwa di Mahkamah Sesyen hari ini, atas pertuduhan cubaan membunuh seorang lelaki berusia 36 tahun dalam satu kejadian tular di media sosial