KUCHING: Program Imunisasyen Covid-19 Nasional Anak Mit (PICKids) beumur lima nyentuk 11 taun di Sarawak ke berengkah kena 3 Februari tu tadi nerima timbal ke manah ari apai indai.

Sapit Kepala Menteri Datuk Seri Dr Sim Kui Hian madah, iya gaga meda sukung ari apai indai ke sanggup limpang mai anak diri nerima vaksin nya taja sida kiruh gawa.

“Aku meri terima kasih ngagai semua ke ngambi bagi. Kitai ulih meda bala nembiak chukup gagit enggau berani, taja pia bisi mega dipeda nyabak ketegal takut.

“Tu ngelai semangat penyerakup rayat Sarawak ti ngujungka kitai ulih nyapai tikas vaksinasyen pemadu tinggi ba menua tu,” ku iya.

Adun Batu Kawah nya mansutka jaku nya maya ngabas PICKids di KlinikPengerai Batu Kawa begulai enggau Sapit Menteri Pengerai I Datuk Dr Noor Azmi Ghazali di tu, kemari.

Dr Sim, ke mega Menteri Pengerai Mensia Mayuh, Pengawa Berumah enggau Kaunsil Kandang Menua meransang apai indai ke bedau nganjung anak sida betuchuk vaksin patut lengkas bejalaika pengawa nya.

“Tu beduduk ari kitai diatu benung napi gelumbang varian Omicron ba menua tu, Sarawak mega ngerikodka penyampau ke chukup mayuh ari siti angka nyadi tiga angka kena rampit dalam sehari.

“Taja pangka varian Omicron enda raya tang tau mega mega nganu nyawa nyema iya ngerampit orang lunggar umur ke bisi bepemedis.

“Nya alai vaksin nya beguna amat ngagai bala anak mit beumur 5 nyentuk 11 taun laban sida mudah kena rampit ari diri sebilik,”ku iya.

Iya mega madah, vaksin nya nyadi senjata besai dikena nagang Covid-19 enggau pengawa perintah tentu puntang enti nadai siukung ari rayat.

“Perintah sayau ke semua rayat enggau naka ulih nyaga sida, nya alai anang mendingka jaku selebubu ngapa laban enti kitai nadai divaksin, orang ke pedis iya nya kita empu,” ku iya.

Berebak enggau nya, iya meri pengaga ati ngagai Opis Menteri Pengerai (KKM), JOpis Pengerai Sarawak denggau Opis Pelajar Sarawak laban udah besaup enggau perintah nengeri ngemujurka pengawa meri vaksin nyentuk nyapai tikas ke pemadu tinggi.