Program ‘Souls’ neleba nembiak nyadi ketuai

KUCHING: Seriris enggau tuju perintah nengeri ti deka nyapai jeman ekonomi digital ngambika ulih ngemansut ulah nembiak nyadi ketuai jemah Tabung Ekonomi Gagasan Anak Bumiputera Sarawak (Tegas) bebendar ngatur program Sarawak Youth Leaders (Souls) .

Menteri Muda Pemansang Mengeri enggau Pengeraja Asal ti mega Chairman Tegas Datuk Len Talif Salleh madahka atur program Souls tu patut digaga ba selampur Sarawak.

“Aku besetuju enggau buah penemu Chairman Souls Surai Anthony Abel ti minta program Souls tu diatur ba bagi menua bukai di Sarawak.

“Program tu deka muka peluang ngagai bala anak biak ngambi penemu sereta nambahka ulah manah nyadi ketuai ngagai kitai jemah ila,” ku iya.

Len Talif bejaku munyi nya ba Pengerami Penutup Souls di Palan Ecocamp enggau Pematih Sumiran ditu, tadi.

KENANG…Datuk Len Talif Salleh (belakang, lima kanan) begambar bebala mayuh ba Pengerami Penutup Souls di Palan Ecocamp enggau Pematih Sumiran ditu, tadi.

Ku iya, taja Tegas tu gerempung ukai dikuasa perintah (NGO) tang sida ngembuan tuju deka nyeridi ulah bala nembiak awakka ulih nyadi ketuai ti bepenau enggau bepenemu.

“Kitai ngarapka nengah Souls bala nembiak diberi peneleba sentang ulah nyadi ketuai, sayauka menua enggau mayuh ulah manah ti bukai.

“Pia mega, Tegas andalka sida penyereta ulih ngena penemu enggau penau ti dikeulih maya Souls dikena maya ngisi pengawa puang enggau gawa ila.

“Tu laban, ba progam Souls kitai ngajar sida ngembuan ulah enda rawan ngaul diri enggau orang bukai ti ngujungka sida ulih berkomunikasyen bebala mayuh,” ku iya.

Souls diatur nitihka tiga renggat iya nya ngajar bala penyereta bekerjasama, berkomunikasyen enggau ngembuan ulah ti manah.

Souls sekali tu disereta 38 iku penyereta ari empat bengkah palan pelajar tinggi iya nya Kolej Segi, Palan Pemansang Penau Sarawak (PPKS/ICATS), Palan Pematih Pengajar Batu Lintang enggau Unimas.

Sama bisi datai kemari, Raban Kaunsil Tegas (Ahli Lembaga Tegas) ti mega Adun Telang Usan Dennis Ngau, Chairman Souls Surai Anthony Abel, bala pengajar, bala penyereta enggau ke bukai.

Suara Sarawak