MARUDI: Program ‘Talk to Us’ nya entara inisiatif Indu Opis Polis Marudi ngenyemakka diri enggau mensia mayuh sereta nagang kes penyalah dalam komuniti.
Tuai Polis Pelilih (KPD) Marudi, DSP Mohd Ruslan Mat Kib madah, program ti diatur ba Dataran Marudi berengkah ari pukul 2 ngagai 4 lemai nya udah nyapai tuju.
“Program nya inisiatif nerenak semangat begulai entara polis enggau komuniti ti nyadi mata enggau pending Polis DiRaja Malaysia (PDRM) kelebih agi Balai Polis Marudi,” ku iya.
Mohd Ruslan madah, ba program nya, polis udah nyendiaka kaunter servis ngagai mensia mayuh baka nerima sebana tauka ripot.
Pia mega, polis nerima timbal ari mensia mayuh pasal tikas servis Balai Polis Marudi enggau penerang pengelikun, penyalah enggau dadah.
