Program tibang pemakai di Betong mesti dikemujur

BETONG: Perambu sereta program nambahka pemansut betanam betupi majak dipejalai berenggat ngambika Bagi Menua Betong nyadi palan tibang pemakai.

Sapit Kepala Menteri, Datuk Amar Douglas Uggah Embas madah, palan tibang pemakai tu mesti dipejalai ba timpuh tiga taun ari diatu.

“Kebuah pia laban maya nya, padang bilun (STOLport) Bebuling, Spaoh disadang tembu dikena ngangkut asil betanam betupi ngagai makit luar.

“Nya kebuah, diatu perintah udah nyendiaka sekeda perengkaguna baka Palan Ngumpul, Nginjin enggau Nungkus (CPPC) ba Simpang Layar ungkup ngumpul rian enggau siti agi ba Spaoh,” terang Uggah.

Menteri Betanam Betupi, Tanah Adat enggau Pemansang Kandang Menua nya mansutka jaku nya lebuh ngulu penerang pasal projek di baruh Dana Mudah Cara Pertanian (AFF) ba Bagi Menua Betong, ditu kemari.

Ku Uggah, tu nyengkaum ngemanah opis organisasyen pekebun pelilih ngambi ngubah chara nginjin lada, gula apong enggau madu kelulut ngagai chara moden.

“Pia mega, perintah merambu palan mandangka pengawa betanam betupi dikena ngajar enggau mantaika chara betanam betupi moden baka fertigasyen.

“Nambahka nya, Opis Skim Kaunsil Pengempung enggau Pengintu Tanah Sarawak (Salcra) ditu deka bejalaika pengawa nupi jelu kelimpah nambahka kebun sawit enggau nagit ngembuan 1,000 anak chapi ninting taun,” ku iya.

Terang Uggah, Palan Tibang Pemakai Betong-Sarikei enggau Agropolitan Bukit Sadok deka nyadi palan pemansut besai.

Iya mega madah, perintah deka ngangauka pemeranak puku peribit ngaul pengawa tu.

Sama datai Adun Layar Gerald Rentap Jabu, Sekretari Politik Kepala Menteri Dr. Richard Rapu enggau Pemesai Betanam Betupi Bagi Menua Betong Petrus Kang.

Suara Sarawak