KANOWIT: Kepala Menteri, Datuk Patinggi Abang Johari Tun Openg madah pemujur program vaksinasyen Covid-19 Sarawak diatu udah manggai ba tikas ke pemadu manah.

Ku iya, asil positif nya bekau ari pengeransing semua lebih agi raban terabai komuniti ke udah bekenanas ngemujurka program ukai semina ba mengeri tang mega ba menua ulu.

Naka tu, ku iya Sarawak udah nyapai 65 peratus, rayat udah genap nerima tuchuk dos kedua.

“Aku ngarapka program vaksinasyen Sarawak ulih nyapai 80 peratus kena Ogos ila lalu andal pekara nya ulih nyadi nyata enti semua meri kerejasama.

“Aku bisi dipadah, kes pemati ketegal Covid-19 di Sarawak bisi kusut. Bepelasarka penerang ke diterima, penyampau pesakit ke dipasuk ba wad emejensi mega udah kurang.

“Kes ke bisi nyadi iya nya kategori 1 enggau ketagori 2, enda datai ba tikas raya. Tu mandangka asil positif, aku meri puji ngagai semua rayat Sarawak,” ku iya ba aum pemberita pengudah ngabas Palan Meri Vaksin (PPV) Mindah Kin Kitu, kemari.

Abang Jo mega madah, pengawa manah tu mandangka Sarawak ransing nyapai imuniti beraban nengah program vaksinasi aktif nitihka pelasar ke betul.

Ngelansa pasal sukung ari raban soldadu bekaul enggau program nya, kerejasama raban pengelikun endang mayuh mantu ngemujurka pogram lebih agi ba menua pesisir enggau menua ulu.

Tambah mega, ku iya raban soldadu mega chakah ngena bilun, jalai sungai enggau darat ngemujur pengawa meri vaksin ngagai rayat ke udah chukup umur.

“Naka tu, lebih 7,000 peranak udah nerima vaksin nyengkaum ba Nanga Jagau, Kuala Baram, Limbang enggau Lawas. Kelimpah nya, pengawa Opis Residen enggau Pegawai Pelilih mega mayuh mantu ba pengawa tu.

“Ba perintah Sarawak, aku meri terima kasih ngagai sukung ke udah diberi,” ku iya.

Iya mega madah, asil program vaksinasyen ba pelilih Kanowit chukup ngemantup ati pengudah 86 peratus peranak ba sitak nya udah nerima tuchuk dos kedua.