KUCHING: Sepenyampau 100 iku raban kurang penatai pemisi nerima bantu duit raya enggau bakul pemakai ari Yayasan Raghad kemari.
Bantu duit raya enggau bakul pemakai tu disuaka bini Tuai Pemegai Menua Toh Puan Datuk Patinggi Raghad Kurdi Taib ti mega pengempu Yayasan Raghad.
Pemegai Tanggungpengawa Tuai Pemesai Eksekutif (Action CEO) Yayasan Raghad, Datuk Mohd Riffai Rudin Husain madahka, beserimbai bulan Ramadan tu sida meri bantu duit enggau barang dapur baka minyak makai, berau enggau ke bukai.
“Pagi ila (sehari tu) kami deka meri bantu ba Majma Mall laban program tu diatur ukai semina rambau bulan Ramadan aja, tang ba bulan tu bisi lima buah program meri bantu diatur.
“Sehari tu (kemari) 100 iku penerima bantu, pagi ila (sehari tu) bisi 150 penerima bantu ke alai penyampau semua penerima bantu bulan tu bisi 1,000 iku,” ku iya lebuh ditanya pemberita pengudah Raghad nyuaka bantu nya di Medan Hamidah ditu, kemari.
Iya nangkan nya madahka, program nya diatur nengah kerejasama MyCar enggau Yayasan Raghad ti keterubah iya meri barang bantu ngagai penerima di Sarawak.
“Raban ti diselinting nerima bantu tu iya nya raban kurang penatai pemisi enggau raban B40 ti dirikod dalam rikod Baitulmal.
“Kami endang nyelinting sida ti napi penanggul nadai belanja laban Hari Raya ti nyau deka semak.
“Kami mega meri bantu ngagai orang deriba MyCar ti deka ngintu Hari Raya enda lama agi.
“Insyallah, kitai ulih mantu ngagai raban ti diselinting enggau orang deriba di menua tu lalu bantu ti diberi enda semina fokus ngagai orang pengarap Islam aja, tang bansa bukai mega,” ku iya.
Sama bisi datai Menteri Pemansang Orang Indu, Anak Mit Enggau Pengelantang Raban Bansa Datuk Seri Hajah Fatimah Abdullah.
