Projek ari Perintah Besai sigi enda disekat

“Dalam nyendiaka perengkaguna ti meruan ngagai rayat Perintah Sarawak endang nerima sebarang agih belanja ti diberi Perintah Besai.”

KUCHING: Perintah Nengeri endang tetap andalka sebarang agih belanja ti diberi Perintah Besai ke pemaik pendiau rayat menua tu.

Sapit Kepala Menteri ti mega Menteri Wang Kedua Datuk Amar Douglas Uggah Embas madahka Gempung Parti Sarawak (GPS) endang dekaka penguntung ungkup rayat menua tu ngasaika pemansang ti nadai penanggul.

“Dalam nyendiaka perengkaguna ti meruan ngagai rayat Perintah Sarawak endang nerima sebarang agih belanja ti diberi Perintah Besai.

“Nadai kebuah nyekat projek-projek ti manah ngagai pemansang menua nya kebuah perintah nengeri nyanggup nanggung projek ti tejanggal laban deka meri pemaik ngagai rayat,” ku iya.

Datuk Amar Douglas Uggah Embas

Uggah bejaku munyi nya lebuh ditanya pemberita pengudah nyadi Chairman Aum Kaunsil Pengereja Pengawa Nengeri ditu, tadi.

Tandu iya, tegal ngira pemanah ngagai rayat nya alai GPS sanggup mutarka penanggul ti tebantai nenggah aum komiti tu.

“Sekeda pekara ti dipejurai ba aum nya nyengkaum agih belanja sekula repuk ngambika agih belanja nuju sekula repuk enda putus.

“Pia mega, pekara bukai ti dipejurai kami bekaul enggau tanah ungkup opis pengerai,” ku iya.

Tandu Uggah, isu sentang opis pengerai tu deka diputarka nengah Menteri Kaunsil Kandang Menua enggau Pengawa Berumah Datuk Prof Sim Kui Hian ngambika seriris.