Projek di Dun Dalat mupuk dipejalai baru

DALAT: Pengudah masuk Atur Tagang Pejalai Penyuman (PKPP), sekeda projek ba sitak Dalat mupuk dipejalai baru pengudah berapa bulan ditangguh ketegal pengerekai igi penyakit Covid-19.

Kena Hari Tiga tu tadi, Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit ti mega Kaban Kunsil Nengeri (Adun) Dalat, Datuk Seri Hajah Fatimah Abdullah keran ngemansangka sitak iya enggau udah ngabas taba projek ngambi beratika pejalai projek nya diatu.

Ba pejalai nya, iya udah ngabas taba Projek Galeri Warisan Melanau, Oya ti nyadi palan mandangka main asal enggau adat raban bansa Melanau nyengkaum rikod aktiviti ekonomi komuniti Melanau iya nya industri mulung enggau pengawa berikan.

Udah nya, Fatimah ngabas Projek Benteng sungai ti tusur ba sungai Kampung Kekan Seberang, Dalat enggau projek tambah lalu ditampung pejalai ngabas Projek Kompleks Kebajikan Pelilih Dalat.

Nitihka penerang, iya madahka kompleks tu ngembuan empat seksyen besai endur Opis Pengintu Pengelantang Pelilih Dalat, Palan Mulaika Pemanah Ulah Komuniti (PDK) ungkup Orang Nyelai Pendiau (OKU), Taska OKU enggau Palan Aktiviti Orang Tuai (PAWE) Dalat.

Pia mega, iya udah ngabas taba Projek Ngaga Baru Dewan Makai (Gazebo) ba sitak Balai Komuniti Pelilih Dalat enggau Projek Ngemanah Waterfront Dalat.

“Kandang waterfront nya deka dikena ungkup pengawa belepa enggau diri sebilik sereta endur ngatur aktiviti ninting minggu ungkup gerempung baka PAWE Dalat.

“Palan tu deka ditapatka bala pedagang bejual ngelingi waterfront lebuh projek tu tembu ila,” terang Fatimah.