Projek infrastruktur tejanggal ditampung baru

KUCHING: Projek infrastruktur udah dikemendar Perintah Sarawak deka ditampung baru pengudah semua sektor ekonomi berengkah dibuka ba menua tu.

Kepala Menteri Datuk Patinggi Abang Johari Tun Openg madah, Malaysia diatu datai ba timpuh Atur Tagang Pejalai Penyuman (PKPP) lalu Sarawak udah nyikap diri napi pemar ekonomi ungkup timpuh pandak enggau panjai.

Ku iya, RM30 bilion udah dikemendar nyengkaum projek ke benung dipejalai udah diketuka dulu berindik ari pengerekai Covid-19 selampur dunya.

“Lebuh penusah besai tu nyadi, semua projek udah dikemendar perintah nyengkaum sekeda projek benung dipejalai baka projek jalai alun, jematan, bekal ai enggau kuasa karan sereta projek transfomasyen menua pesisir diketuka dulu pengelama tiga bulan.

“Ungkup timpuh pandak pengudah semua ekonomi dibuka berenggat, kami deka ngepunka baru pejalai projek tu nyengkaum Jalai Besai Pan Borneo laban tu deka nyungkak ekonomi kitai.

“Nengah semua projek infrastruktur deka dipejalai nyentuk taun 2021-2022 tu, ekonomi nengeri deka nerima pangka positif,” ku iya.

Abang Johari madah munyi nya lebuh randau webinar bekaul enggau Post Covid-19: Sarawak The New Normal diatur Malaysia Productivity Corporation (MPC) tadi.