BETONG: Kaban Kaunsil Nengeri (ADUN) Layar Gerald Rentap Jabu bejadika pengawa nasih tanah enggau pengawa miring beserimbai pengawa ngaga Jalai Ijok, Teguyu, Lempaong, Batu Pesok, Rantau Layang sereta Perdu fasa Keterubah ba Spak di rumah panjai TR Kasa, kemari.

Ku iya, jalai sepanjai urung semilan kilometer enggau saiz R1 Standard diperambu tembu dalam timpuh 27 bulan iya nya kena ka Jun 2021.

Pengawa ngaga jalai nya ku Rentap ulih nambahka mayuh agi pemansang nyengkuam nyungkak pengawa betanam betupi Agropolitan Bukit Sadok.

Kelimpah ti meri peluang ngagai peranak menua nya ngambi ngaga mayuh macham aktiviti betanam betupi dikena ngemansangka tikas ekonomi.

Ku Rentap mega, jalai nya siti inisiatif Perintah Sarawak dipegai ba baruh Gabungan Parti Sarawak (GPS) ngambika rayat disambung enggau infrastruktur jalai raya ti manah.

Bisi mega ngulu pengawa tu iya nya Sekretari Politik Ketuai Menteri Dr. Richard Rapu, Pemesai Pelilih Betong Sofhi Jebal enggau bala ketuai raban bansa sereta komuniti besemak.

MINTA BEREKAT.. Gerald Rentap Jabu sereta temuai bukai ngemujurka pengawa miring minta berekat.

Suara Sarawak