Projek Jalai Nanga Banjor – Nanga Makut – Nanga Engkuah di Song benung digaga

SONG: Projek jalai ari Nanga Banjor ngagai Nanga Makut Renggat Keterubah enggau Nanga Makut ngagai Nanga Engkuah Renggat Kedua diatu benung dipejalai.

Pia mega, projek bukai ba kandang menua nya mega deka dipejalai udah projek jalai nya.

Adun Katibas, Dato Sri Ambrose Blikau Enturan madahka, entara pemansang ti dikemerat pengudah projek jalai tu tembu nya, bekal ai beresi enggau kuasa karan.

Iya mega madahka jalai nya deka nyadi penyambung kandang menua nya ngagai Ulu Katibas.

Blikau mansutka jaku nya lebuh Pengawa Nutup Program Betanam Betupi Ngaul Komuniti (AgriCOP) Renggat Pelilih Song di Rumah Selugo, Karangan Rangkang, Katibas, apin lama ke udah.

Nambahka nya, iya ngarapka rayat anang pechayaka jaku dibantai penyakal ti madahka Perintah Gempung Parti Sarawak (GPS) nadai mai buah pemansang ba Dun Katibas.

Ba pengawa nya, Blikau udah bejadika Skim Kuasa Karan Altenatif Menua Pesisir Sarawak (Sares) Rumah Selugo, Rumah Matan enggau Rumah Gendang.

Pia mega, Blikau mega udah bejadika jematan besi Rumah Selugo.

Blikau mega udah nyuaka geran Projek Mit Pemansang Menua Pesisir (MRP) penyampau RM101,000 ngagai 12 Komiti Pemansang enggau Pengelikun Genturung Pendiau (JKKK).

Nangkanka nya, iya mega nyuaka agih belanja RM10,000 ungkup Biro Indu Rumah Selugo, Karangan Rangkang.

Sama datai Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua Sarawak, Edwin Abit sereta bala temuai dipebasa bukai.