Projek Jalai Padawan-Tebedu terus dipejalai enti GPS agi diberi kuasa

SERIAN: Kuasa Gempung Parti Sarawak (GPS) nyau deka abis timpuh, ku Kepala Menteri Datuk Patinggi Abang Johari Tun Openg.

Iya ti mega Chairman GPS madahka kuasa GPS deka abis timpuh taun 2021.

“Enda lama agi kuasa GPS deka abis, tang enti kita agi magi kuasa tu ngagai GPS, projek jalai alun tu deka terus dipejalai.

“Kuasa GPS naka 2021 tang projek ngaga jalai alun tu agi lama, nya kebuah enti kita agi meri kuasa tu ngagai GPS, nyadi pengawa ngaga jalai tu endang tetap dipejalai,” ku iya.

Abang Johari bejaku munyi nya ba pengerami bejadika Projek Nyeruri Jalai Padawan Renggat Keterubah Tapah Bagi Menua Serian ditu, kemari.

Datuk Patinggi Abang Johari Tun Openg

Kenu ku iya, pengawa nyeruri Jalai Padawan ba renggat kedua nuju Jalai Kampung Ana Rais lalu deka dipasuk ngagai projek ngaga jalai ke Tebedu.

“Agih belaja nyeruri jalai tu besai iya nya RM197 juta.

“Tu bereti ungkus ngaga jalai alun nya enti ditambah bisi RM220 juta (Jalai Padawan nuju Kampung Annah Rais nyentuk ke Tebedu).

“Projek tu deka diteruska nyema GPS agi megai perintah,” ku iya.

Iya nyemetak madah sigi enda bula ke semaya.

“Aku ukai baka Pakatan Harapan (PH) semina pandai besemaya aja tang bula.

“Enti aku udah nyebut, aku mesti ngamatka danji nya,” ku iya.

Abang Johari ngarapka rayat ba pelilih Tebedu enggau Mambong meri sukung GPS.

Suara Sarawak