Projek Jalai Raya ke Ulu Oya nyadi nyata

Urung 17 peranak Rh Seliau ke ngempu tanah NCR kena teresa projek udah nerima setipikit basa

“Udah lama kami ngining projek tu, minta ngagai perintah nengeri lalu diatu nyadi nyata nengah bantu ADUN Tamin enggau ADC Batang Oya.”

ULU OYA : Urung 17 iku pemenggi tanah NCR di sitak Ulu Oya udah nerima setipikit basa ari piak Gerempung Pemansang Sitak Batang Oya-Sekuau-Pakoh (ADC) ba sebengkah pengerami ke diatur ba Rumah Seliau Nanga Tebalai, apin lama ke udah.

Pengerami tu digulu Pemesai Pelilih Selangau Henry Inting Nyami beserimbai enggau penemuai khas iya ngagai sitak Selangau.

Tuju setipikit nya diberi ngagai sida laban udah setuju ngemendarka tanah sida dikemansang dikena ngagai jalai raya ti besambungka rumah panjai ngagai jalai besai.

PEMAIK KEREJASAMA …Semua peranak ke ngempu tanah kena teresa projek jalai bela nerima setipikit ba pengerami nya.

Jalai penyauh 3Km nya dipinta sida serumah ngagai Kaban Kunsil Nengeri (ADUN) Tamin Ir Christopher Gira Sambang nengah gerempung pemansang Sitak Batang Oya-Pakoh-sekuau tauka ADC Batang oya.

Ba pengerami nya, Chairman ADC Batang Oya Henry Kanyan nyuaka setipikit nya ngagai semua sida ke menggi tanah seraya dikemataka Henry Inting enggau Penghulu Ngalai Anak Asom.

Ba jaku iya, Henry Kanyan madah tu projek keterubah gerempung pemansang sitak Batang Oya-Pakoh-sekuau begulai enggau ADUN Tamin sereta bekerejasama enggau Serikat Mutiara Alam Jati nengah CSR.

“Perambu projek tu ngambi awak semak setaun diperati sereta dipansik sebedau iya dikemujur.

“Pangka ari projek tu jemah deka nyungkak pemansang sosio ekonomi rayat ba bidang betanam betupi,” ku iya nengah penerang ke dianjung ngagai Suara Sarawak, kemari.

Nangkan nya, siku peranak Rh Seliau, iya nya Gani Anak Entri madah juluk sida udah nyadi nyata deka meda jalai raya disambung ngagai rumah panjai.

“Udah lama kami ngining projek tu, minta ngagai perintah nengeri lalu diatu nyadi nyata nengah bantu ADUN Tamin enggau ADC Batang Oya.

“Pia mega ADUN Tamin disadang ulih mantu nengah RTP ungkup meli batu jalai.

Berebak enggau nya, Henry Inting muji pengawa ke udah digaga ADC Ulu Oya ba pengawa mantu rayat di menua pesisir.

“Kitai meri terima kasih ngagai semua ke udah besaup ngemujurka juluk tu. Kitai bela nemu projek jalai raya ba sitak tu entara pemeri ke chukup besai reti ngagai rayat,” ku iya.

Ba pengujung pengerami, dia peranak rumah panjai bela sepenemu ngembuan juluk nyema jalai raya udah tembu jemah sida deka ngepunka Projek Nanam Nanas ba Ulu Oya dikena nyungkak penatai pemisi.

Sama bisi datai bala tuai rumah ke besemak enggau Batang Oya.

TERIMA KASIH…Tr Seliau nerima setipikit ngarika nembiak redak iya ari Penghulu Ngalai seraya dikemataka Henry kanyan enggau Henry Inting.

Suara Sarawak