SERIAN: Menteri Besai Datuk Seri Ismail Sabri Yaakob meri jamin deka neruska Renggat 2 Jalai Raya Pan Borneo ti dikinsil Perintah Harapan (PH).

Ku iya, pengawa neruska randau begulai Kepala Menteri Datuk Patinggi Tan Sri Abang Johari Tun Openg enggau Menteri Kereja Raya Datuk Seri Fadillah Yusof deka dipejalaika nangkan tu ila.

“Renggat kedua Jalai Raya Pan Borneo tu ngaul pejalai ari Limbang ke Lawas, ‘missing link’ ari Kuala Baram ke Sungai Tujoh CIQ enggau jalai jai ti udah bisi mesti diseruri.

“Kitai enda deka ngetu ditu, kitai deka neruska nyentuk semua projek tu tembu,” ku iya.

Ismail bejaku munyi nya lebuh bejadika Program Muka Jalai Raya Pan Borneo Sarawak ‘Jajaran’ Serian ditu, kemari.

Ku iya, bajet bagi renggat kedua jalai raya nya udah dikemendarka Perintah Barisan Nasional (BN) sebedau tu tang dikinsil rambau perintah bekalih ngagai PH pengudah Pengawa Bepilih Besai (PRU-14) ke dulu.

“Nya ti ngasuh projek Jalai Raya Pan Borneo, ‘missing link’, ‘red link’ enggau ke bukai nadai ulih diteruska.

“Nyema nadai bekalih udah tentu projek tu diteruska, Perintah Besai sigi udah meda perengkaguna tu beguna dikena ngemuntangka pejalai enggau ngerembaika ekonomi Sarawak,” ku iya.

Iya nangkan ke nya madahka perintah mega komited deka ngemansangka infrastruktur digital ba Sarawak.

Ku iya, Perintah Besai udah ngagaihka belanja ti besai bagi projek Sambung Digital Menua (Jendela) iya nya lebih RM4 billion awakka ulih meri japai internet ti majak manah ba Sarawak.

“Pandemik Covid-19 udah meri pangka negatif ngagai pengidup tang ari sukut ekonomi digital aku meda pekara nya majak ngerembai.

“Nya alai, fokus perintah diatu nuju ekonomi digital laban dunya udah berubah ke alai semua pekara udah ba tunjuk jari,” ku iya.