Projek jalai ukai jaku manis dikena bepilih

SADONG JAYA: Pengawa nyeleti enggau ngaduka jalai tebing pantai Seksyen 1 ari Sadong Jaya ngagai Sungai Buluh dipelaba tembu Oktober tu ila nengah agih belanja RM9 juta.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka projek 8 kilometer pemanjai nya sebagi ari pakej ba baruh pengawa ngemanah jalai tebing pantai di selampur menua.

“Ari 961 buah jalai tebing pantai ba selampur menua 321 buah jalai pesisir ti udah bisi ditukuka patut kemanah. Kitai ukai semina deka ngetar jalai nya baru, tang kitai deka nyikap tisi jalai alun kelimpah ngemanahka jalai ti bisi rusak,” ku iya.

Julaihi madah munyi nya maya ngabas projek jalai tebing pantai Simpang Empat, Kampung Iboi ditu, kemari.

Ku iya, pengawa ngemanah tebing pantai tu beguna laban jalai nya nyadi jalai besai ungkup penguna jalai alun seraya nganti Jalai Raya Kedua tembu.

Berebak enggau nya, Julaihi madahka projek jalai tebing pantai tu ukai jaku manis ungkup pengawa bepilih ti deka datai.

“Bisi sekeda orang madahka pejalai kami kitu nandaka pengawa bepilih udah semak. Projek tu endang pengawa terus ti diperambu Perintah Sarawak ungkup pemaik rayat.

“Aku bisi macha orang madahka projek tu jaku pemanis, tang nya ukai,” ku iya.

Sama bisi datai Adun Sadong Jaya Aidel Lariwoo enggau ke bukai.

Suara Sarawak