Projek lampu jalai Puncak Borneo enda ibuh dipolitik

KUCHING: Perintah Besai mayar 50 peratus ari ungkus bekal kuasa karan lalu laluh 50 peratus dibayar piak Opis Kaunsil Kandang Menua (PBT), ku Kaban Parlimen Puncak Borneo Willie Mongin lebuh nyaut tanya bekaul enggau belanja tambah ungkup projek ngaga lampu jalai Puncak Borneo, kemari.

Ku iya, enti nitih logik, semua PBT di selampur menua tu semina mayar 50 peratus kos ulang bekal kuasa karan lalu laluh nya dibayar Perintah Besai nengah Opis Menteri Pengawa Berumah enggau Kaunsil Kandang Menua (KPKT).

“Pekara tu enda ibuh dipolitikka kitai laban tu tanggungpengawa semua piak,” ku iya lebuh dirandau pemberita pengudah bejadika pampang keterubah Nang Ori di Kuching Sentral ditu, kemari.

Apin lama, Chairman Majlis Perbandaran Padawan (MPP) Lo Khere Chiang madahka belanja tambah patut diberi dikena nampung ungkus betandu ngagai projek lampu jalai pemanjai Jalai Ouncak Borneo ke bejngkus RM3 juta nya.

Ku iya, agih RM3 juta enda umbas laban nya semina dikena ngaga infrastruktur aja tang nadai nyengkaum ungkus dikena nampung bekal kuasa karan.

Taja pia, Willie madahka iya udah berandau enggau Khere Chiang ngambika nerangka pekara nya.

“Iya madahka diri deka berandau enggau bala staf iya ngambika mansik baru pekara nya.

“Engka iya enda tepeda ke pekara tu berindik ari pemayuh pengawa iya lalu kami deka seruran mantu komuniti ba sitak nya,” ku iya.

Nangkan nya ku Willie, ungkus nya iya nadai meri penanggul ngagai pejalai projek lampu jalai nya lalu bepanggai ngagai sida MPP ti nyadi ejensi pengatur bejalaika projek nya.

“Perintah Besai enggau Perintah Sarawak deka seruruan mai pemansang ngagai komuniti ba menua tu sereta begulai napi penanggul ke bisi ba menua tu,” ku iya.

Nambah nya ku Willie, projek lampu jalai Puncak Borneo tu nyengkaum pemanjai jalai Batu 14 ngagai Kampung Annah Rais udah diberi agih belanja RM3 juta ari KPKT ba taun 2019.

“Penyampau RM200,000 udah diagih ngagai MPP lalu lalu RM2.8 juta deka diberi nitih renggat taun tu.

“Tu siti pekara ti manah ngambika komuniti di sitak Puncak Borneo enda tinggal ngasaika pengelantang tu sebaka enggau sebengkah jalai bukai ke udah diberi pengelebih lampu jalai tu,” ku iya nambah.

Willie mega madahka iya nadai penerang ti silik bekaul enggau penyampau tiang lampu jalai ti deka dipasang lalu meri tanggungpengawa nya ngagai MPP bejalaika semua bekaul enggau projek nya.

Suara Sarawak