KUCHING: Perintah Sarawak deka nyambung projek nyeruri tebing sungai ari Sungai Bedil ke Kampung Tupong sereta mutar isu bah ba kandang menua tu.
Premier Sarawak, Datuk Patinggi Tan Sri Abang Johari Tun Openg madah projek nyeruri tebing sungai ari Sungai Bedil ke Kampung Tanjung udah digaga ngambi meri pemaik ngagai rayat ba kandang menua nya sesais enggau ngelantang ati.
“Udah tu kitai deka nampung nyeruri tebing sungai tu ari Kampung Tanjung ke Kampung Tupong awak ke palan tu manah agi.
“Kitai mega deka ngemanah kandang menua di kampung belumur iya nya ari Kampung Lumur Satu nyentuk Kampung Lumur Enam,” ku iya.
Abang Johari bejaku munyi nya rambau bejadi Hari Mengeri Kuching Ke-35 ba Waterfront Kuching ditu, kemari.
Iya nangkan nya madah iya udah minta Dewan Bandaraya Kuching Utara (DBKU) ngemansangka jalai ngaul Bako enggau Buntal awak ke ulih muka jalai pemansang ba Petrajaya.
“Majlis Bandaraya Kuching Selatan (MBKS) mega udah mansang baka Jalai Song ngagai Vivacity, Stutong enggau jalai ke palan penerebai bilun.
“Seraya nya kitai nyaga palan rizab enggau ngemanah menua baka di Padungan ti nyadi palan pesaka sebaka enggau Waterfront,” ku iya.
Abang Johari nangkan nya madah, Perintah Sarawak deka terus ngemansang sekeda palan awak ke nadai bah agi.
“Nya alai, Perintah Sarawak deka meri belanja dikena mutar isu bah laban kitai ngarap ba taun 2030 ila, palan tu bisi perengkaguna pemun nyengkaum ulih diseliahka ari bah.
“Nya endang bekenaka belanja ti besai, lalu kitai deka bekerejasama enggau Perintah Besai nyeruri sistem parit menua.
“Dalam pekara tu, Perintah Sarawak enggai nyadi enda ngempu tanggungpengawa meri belanja besai, seagi penatai pemisi kitai nambah, kitai ulih meri pulai baru ngagai rayat,” ku iya.
