SARATOK: Projek Nyeleti Jalai Ari Kampung Kupang ke Simpang Jalai Bajau ditu ti beungkus RM90 juta agi ba renggat pengawa ngelangkar.
Kaban Parlimen Saratok, Datuk Ali Biju madahka kereja ba taba projek baka kereja nyukat mega benung chakah dipejalai.
Ku iya, pandemik Covid-19 udah ngasuh mayuh pengawa ba taba tejanggal ngujungka projek laun ari timpuh ti udah ditetap.
“Perintah neritka Atur Mindah Betagang (PKP) kena nagang igi penyakit ari ngerekai ngujungka mayuh kereja ti udah diperambu enda ulih dipejalai.
“Taja pia, kereja ngelangkar jalai benung dipejalai baka selama diatu lalu kitai melabaka diri ngaga pemutus ni bagi langkar dikena ila ba ujung bulan Februari 2022.
“Aku andal amat projek tu ulih ditinda ba suku kedua ba taun 2022,” ku iya ba sebengkah penerang berita ngagai Suara Sarawak, tadi.
Ali ti mega Adun Krian madah, nya sebagi ari projek dikuasa Opis Menteri Pemansang Menua Pesisir (KPLB) lalu Opis Kereja Raya (JKR) Sarawak udah dipadu nyadi ejensi bejalaika projek nya.
Projek nyeleti jalai batu urung 16.9 kilometer (km) pemanjai ke bisi diatu ngagai jalai belakin mungkur jalai tama ngagai genturung pendiau enggau sekula ke bisi 3.6 km.
“Entara jalai nya, jalai ngelawa Rumah Ganing, Rumah Rengan, Rumah Lakon, Runmah Anau enggau Sekula Primari (SK) Sungai Entebu sereta nukar tiga buah jematan mit.
“Nya alai, aku pechaya projek tu ukai semina meri pemaik ngagai peranak ke diau dia tang mega bala pekebun mit ke bukai sereta raban sekula,” ku iya mantaika pengandal diri.
