Projek Nyeleti Pagar SK Landeh disadang tembu enam minggu

KUCHING: Pekara pengelantang rayat endang nyadi fokus besai Perintah Besai ke diatu.

Serak tu, Chairman DAP Batu Kitang Abdul Aziz Isa nampung pejalai pengawa nengah inisiatif Projek Nyeleti Pagar Sekula Primari (SK) Landeh, sitak Dun Batu Kitang ditu.

Nitihka penerang, sebedau tu Kepala Pengajar Nur Sarah Sandra Stephen bisi nganjung peminta projek nya dalam bulan Mei laban berundingka pengelikun bala nembiak sereta staf bukai.

Projek udah nerima pemendar ari Sapit Menteri Dagang Dalam Menua enggau Pekara Bebeli Barang KPDNHEP, Chong Chieng Jen dalam bulan June tu tadi.

Tinda udah dikeluar dalam bulan Ogos ke alai kunteriktor mega udah dipilih dalam bulan September seraya projek tu disadang tembu kurang ari enam minggu.

Abdul Aziz disempulang raban ari Opis Pemansang Nengeri (PPN) mujur nyerahka projek nya ngagai piak kunteriktor ti udah dipadu gawa, pagi kemari.

Penatai sida sebuat diterima manah raban sekula lalu udah dibai Nur Sarah bejalai ngabas pagar sekula ti deka diseleti.

Dulu ari nya, Abdul Aziz mega udah nyuaka chek pemeri pelajar penyampau RM500 ngagai Leonard Smith Jais ti baru nampung pelajar semester keterubah dalam bidang Sarjana Muda Ekonomi di Fakulti Ekonomi dan Pengerusan, Universiti Kebangsaan Malaysia (UKM).

Chek nya udah disua ngagai apai iya empu, Jais ari Taman Samarindah, sitak Parlimen Kota Samarahan ba Indu Opis DAP Sarawak ditu, kena Hari Satu tu tadi.

Kelimpah ari nya, Abdul Aziz bisi nyuaka pemeri penyampau RM12,000 ngagai Kawasan Rukun Tetangga (KRT) 4S ba Dewan Serbaguna Kampung Semeba, Dun Batu Kitang.

Chek udah disua ngagai Chairman KRT 4S Pengajar Jisin Nyud beserimbai enggau Program Aku Pun Layak Dapat Sijil seraya dikemata Ketuai Kampung (KK) Semeba Thomas Gaon, Sapit Presiden BGA Prof Dr Andrew Ragai sereta bala Komiti KRT 4S ke bukai.