Projek nyendiaka bekal di Sarawak disadang tembu penuh 2022

KUCHING: Bekal kuasa karan di selampur menua Sarawak dipelaba tembu tumu tiga taun ari tagit sebedau tu iya nya taun 2025.
Menteri Utiliti Datuk Seri Dr. Stephen Rundi Utom madahka Sarawak dipelaba deka bulih 100 peratus bekal kuasa karan ba taun 2022.

“Penatai bekal kuasa karan 100 peratus di menua nyangka tumu agi ari perambu sebedau tu, engka ba taun 2022 udah tembu.

“Enti enda ketegal Covid-19 pengawa nyambung bekal kuasa karan tu engka jauh lebih mujur,” ku iya.

Rundi bejaku munyi nya aum media pengudah ngemataka pengawa nyain Sempekat Pemereti Ati (MoU) entara Opis Menteri Utiliti enggau Palan Pemansang Peneleba Sarawak (Sarawak Skills) sereta Akademi Binaan Malaysia (ABM) di Begunan LCDA ditu, tadi.
Ku iya, ketegal Covid-19 bala kunteriktor napi sekeda penanggul baka nadai pekereja.

“Nya alai, perintah begunaka sukung semua piak ngaga pekara pemadu manah ngagai menua tu.

Suara Sarawak