Projek Nyeruri Jalai Padawan renggat keterubah tembu September 2022

KUCHING: Renggat keterubah Projek Nyeruri Jalai Padawan ke beungkus RM34.9 juta dipelaba tembu bulan September 2022.

Kepala Menteri Datuk Patinggi Abang Johari Tun Openg madahka projek tu kebendar ba baruh tanggungpengawa Perintah Besai (lebuh Pakatan Harapan megai perintah) tang dikinsil.

“Sepengelama 22 bulan kita di Padawan nganti projek tu dipejalai tang nadai bulih utai.

“Lebuh Roland (Adun Tarat Datuk Roland Sagah Wee Inn) madahka pekara tu ngagai aku, aku nadai berunding panjai lalu ngemendarka agih belanja dikena nyambung projek ngaga jalai nya,” ku iya.

Abang Johari bejaku munyi nya ba Pengerami Bejadika Projek Nyeruri Jalai Padawan Renggat Keterubah Tapah Bagi Menua Serian ditu, kemari.

Kenu ku iya, Jalai Padawan renggat keterubah ti deka diseruri nya sepanjai 15 kilometer bepun ari simpang Padawan ngagai Teng Bukap.

“Kereja nyeruri jalai nya udah bepun digaga bulan September taun siti nyin kemari.

“Taja tejanggal mimit, diatu projek tu disambung ungkup pemaik semua rayat ba pelilih Padawan ditu,” ku iya.

Nya alai, Abang Johari ngarapka bansa Bidayuh ba kandang menua nya terus beserakup ngulihka pemansang.

“Bansa Bidayuh ba kandang menua tu mesti beserakup lalu anang pambar.

“Orang di Semenanjung ngembuan bansa Melayu ti pemadu mayuh, tang sida pambar ngagai enam bagi.

“Nyema kitai pambar, kitai enda ulih kuat lalu mar agi kitai bulih pemansang,” ku iya.

Iya madahka projek nyeruri jalai ba renggat kedua deka dipejalai pengudah renggat keterubah tu tembu.

Tandu iya, projek renggat kedua tu deka besambung nyentukka jalai alun Kampung Ana Rais.

Sama bisi datai Adun Tebedu Datuk Seri Michael Manyin Jawong, Kaban Parlimen Serian Datuk Richard Riot Jaem, Menteri Muda Infrastruktur enggau Pemansang Penyangkai Kapal Datuk Julaihi Narawi enggau ke bukai.

Suara Sarawak