Projek Padang Bilun Bukit Mabong ba proses tinda

KUCHING: Pengawa ngaga Padang Bilun Bukit Mabong ba Kapit begunaka ungkus belanja RM190 juta, pia ku Sapit Kepala Menteri Tan Sri James Jemut Masing.

Ku Masing, langkar padang bilun nya udah tembu lalu diatu ba proses tinda nyentuk taun baru.

Padang bilun tu digaga dalam kandang tiga taun lalu pejalai penerebai bilun 900 meter pemesai ulih endur bilun bansa STOL,ku iya madah lebuh dirandau Suara Sarawak, ditu kemari.

Masing ti mega Menteri Infrastruktur enggau Pemansang Penyangkai Kapal madahka pengawa ngaga padang bilun nya deka nambahka rentayan penyambung ba Bagi Menua Kapit.

Berindik ari nya, kandang menua ulu ulih dikemansang ngambika produk betanam betupi ulih dieksport ba timpuh pandak.

Berebak enggau nya, pemansang tanah ngelingi kandang menua nya mega patut dikemansang jampat,ku iya nerang.

Nya alai ku iya, Opis Menteri Betanam Betupi patut berundingka chara ngerumban bejalaika pemansang ba kandang menua nya.

Pia mega ku Masing ti mega Adun Baleh, eko dagang temuai patut dikemansang lebuh bisi 200,000 hektar taman jelu siga semak padang bilun nya.

Kitai mega patut numbuhka pos pematau soldadu ba Bukit Mabong urung 20 kilometer ari garis entara menua Kalimantan, Indonesia.

Nya kebuah, Padang Bilun Bukit Mabong tu beguna amat ungkup nyaga pengelikun Malaysia kelebih agi ba Sarawak ti dikelingi tiga tekat ai iya nya Bakun, Mulu enggau Baleh,ku Masing.

Kelimpah ari nya ku iya, pengawa ngaga padagng bilun tu deka meri pemaik besai ngagai mensia mayuh ke besemak dia nyengkaum aktiviti ngemansangka ekonomi.

BENUNG DITINDA…Langkar Padang Bilun Bukit Mabong ba Kapit.

 

BENUNG DITINDA…Langkar Padang Bilun Bukit Mabong ba Kapit.

 

Tan Sri James Jemut Masing

Suara Sarawak