Projek pemansang enda ibuh dipolitik

SARIKEI: Mensia mayuh lebih agi penguna media rama dilalau badu agi betalatka isu projek pemansang ba selampur menua Malaysia enggau pekara politik.

Menteri Kereja Raya, Baru Bian madah pekara tu bisi nyadi ba sebelah media rama betalatka perintah besai ngambu projek perintah ke dulu suba.

“Jaku ti nyebut perintah diatu ngambu projek perintah ke suba enda patut laban semua projek tu nguna duit rayat lalu meri pengelantang ngagai rayat.”

“Ari suba kami perintah besai udah netapka penemu enda tau dipolitik isu projek laban barang sapa megai perintah sigi bisi tanggungpengawa besai ngagai rayat. Diatu perintah besai dipegai Pakatan Harapan.”

Baru mansutka pekara nya rambau bejadika Projek Ngemanahka Jalai Kampung Seberang ditu, lemai kemari.

Projek ke beungkus RM48.36 juta nya tembu taun nyin kemari lalu deka meri pengelantang ngagai peranak Kampung Seberang enggau endur bukai ke besemak.

Sama datai ngulu pengerami nya Kaban Parlimen Sarikei Andrew Wong, Kaban Parlimen Saratok Ali Biju, Kaban Direktor Kaunsil Pengawa Konterikta (CIDB) Malaysia Datuk Seri Aditajaya enggau Sapit Ketuai Seketari (Seksyen Pengatur Pengawa) Opis Menteri Kereja Raya Malaysia, Dato’ Dr. Ong Gua Pek enggau Ketuai Projek JKR Sarawak Cassidy Morris.

Naka tu, perintah besai udah ngungkupka agih belanja RM1.102 bilion ngagai Sarawak nengah bajet nasional 2020 lalu projek baru deka dikemendar taun tu iya nya ngaga ‘Flyover Medan Jaya-Jalai Tun Hussein Onn, Bintulu ke dipelaba deka berengkah digaga ba suku keempat taun tu.

Suara Sarawak