Projek Sakit seruran dipatau

KUCHING: Perintah Sarawak seruran ngemata enggau matau semak pejalai Projek Transformasyen Menua Pesisir (RTP) nitihka timpuh udah ditetap nentuka nadai projek sakit.

Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali (GPS-Semariang) madah, projek sakit deka mai mayuh penanggul bukai lalu tau ngasuh rayat nadai pengandal ngagai perintah.

“Kitai dekaka rayat bela ngasaika pengelantang ari semua projek dipejalai nadai ngira sekalika projek infrastruktur pemun enggau projek pemansang bukai.

“Ari taun 2015 nyentuk September 2019, semina dua peratus aja dikategori projek sakit seraya 98 peratus nyapai pemujur.

“Nitihka penerang diberi ngagai aku, naka diatu semina siti aja projek sakit bisi nyadi ba sitak Kabong iya nya projek nyeleti palan bedaja ba Simpang Nyabor.